Steingrímur J.: “Ríkur vilji heimafyrir hélt Sparisjóðnum gangandi”
Skýrsla rannsóknarnefndar Alþingis um fall sparisjóðanna var tekin fyrir á fundi stjórnskipunar- og eftirlitsnefndar Alþingis í morgun. Á fundinum sem sendur var út í beinni útsendingu, sátu fyrir svörum allir ráðherrar sem komu að málefnum Sparisjóðs Keflavíkur í kringum hrunið, auk fulltrúa frá Fjármálaeftirlitinu og Seðlabanka Íslands.
Steingrímur J. Sigfússon var fjármálaráðherra á tímabilinu frá 2009 til 2011, þegar málefni SpKef voru í hámæli. Fram kom í máli hans að ein helsta ástæða þess að SpKef hafi verið haldið gangandi þrátt fyrir erfiða stöðu hafi verið ríkur vilji hagsmunaaðila á Suðurnesjasvæðinu.
„Það er alveg ljóst að staðan var erfið. En það er líka ljóst að ríkur vilji var til að reyna verja þetta, ekki bara hjá stjórnvöldum heldur einnig þverpólitískur vilji, ásamt því sem ríkur vilji var heimafyrir, “ sagði Steingrímur. „Ef viljinn á heimasvæði sparisjóðsins til að halda honum gangandi hefði ekki verið svo mikill hefði sjóðurinn ekki getað starfað eins lengi og raun bar vitni,“ sagði Steingrímur.
Þá kom fram í máli ráðherrans fyrrverandi að vilji Reykjanesbæjar og annara sveitarfélaga á svæðinu til að leggja Sparisjóðnum til aukið fé hafi átt stóran þátt í akvörðun um að halda honum gangandi, auk þess hefði verið ástæða til að ætla að kröfuhafar myndu vilja koma að fjárhagslegri endurreisn.