Taplaust B-lið Njarðvíkur fær Keflavík í heimsókn í kvöld
B-lið Njarðvíkur sem leikur í annari deildinni í körfuknattleik tekur á móti efsta liði Dominos-deildarinnar, Keflavík, í 8-liða úrslitum Powerade-bikarsins í kvöld. Leikurinn fer fram í Ljónagryfjunni í Njarðvík og hefst klukkan 19.15.
Njarðvíkingarnir hafa ekki tapað leik í vetur, unnið alla sína leiki í deild og bikar og eru sem stendur í efsta sæti deildarinnar. Á leið sinni í 8-liða úrslitin lagði liðið meðal annas 1. deildarlið Reynis úr Sandgerði.
Keflvíkingar eru sem fyrr segir í efsta sæti Dominos-deildarinnar og hafa einungis tapað tveimur leikjum í vetur.
Þó leið Keflvíkinga í undanúrslitin virðist greið eru B-liðs menn Njarðvíkinga á öðru máli, Sverrir Þór Sverrisson nýráðinn þjálfari kvennaliðs Keflavíkur og leikmaður B-liðsins sagði leikinn gegn Keflavík leggjast vel í menn:
“Sá leikur leggst bara vel í mig – Við tökum þá klárlega.” Sagði Sverrir í léttum tón.