Keflavík í úrslit Maltbikarsins
Keflavíkurstúlkur tryggðu sér sæti í úrslitum Maltbikarkeppni kvenna í körfubolta með 82-67 sigri á Haukum í kvöld. Keflavík mætir því annað hvort toppliði Dominos-deildarinnar, Skallagrím eða bikarmeisturum Snæfells í úrslitunum.
Haukar hófu leikinn af krafti og náðu fljótt sex stiga forskoti, Keflvíkingar náðu þó að minna muninn niður í tvö stig í lok fyrsta leikhluta, 18-20. Það var svo allt annað að sjá til Keflavíkurliðsins í öðrum leikluta, þrátt fyrir að liðin skiptust á að hafa forystu í upphafi, en undir lok leikhlutans voru Keflavíkurstúlkur komnar í 10 stiga forystu, 45-35.
Liðin skiptust á góðum köflum í upphafi seinni hálfleiks og náðu Haukar að minnka muninn í sex stig í þriðja leikhluta. Staðan fyrir síðasta leikhlutann var hins vegar 59-52, Keflavík í vil.
Keflvíkingar náðu svo tíu stiga forystu á nýjan leik um miðjan fjórða leikhluta og silgdu nokkuð öruggum sigri, 82-67, í höfn.
Ariana Moorer skoraði 20 fyrir Keflavík og Emelía Ósk Gunnarsdóttir skoraði 18.