Ölvun ekki vandamál í Leifsstöð
Ölvun hefur ekki verið vandamál í Leifsstöð, segir Sigurður Skagfjörð Sigurðsson, framkvæmdastjóri Lagardère, sem rekur Loksins bar í flugstöðinni. Barinn er opinn frá klukkan fimm á morgnana og er honum vanalega lokað á miðnætti þrátt fyrir að stundum sé opið til klukkan eitt að nóttu.
Þetta kemur fram í grein Túrista, sem fjallar um málið vegna frétta þess efnis að lokað hefur verið fyrir áfengissölu á flugvellinum í Bergen í Noregi á milli klukkan sex og átta á morgnana.
Í samtali við Túrista segir Sigurður gesti barsins helst panta bjór og léttvín en að lítið seljist af sterku áfengi. Spurður um hvort margir farþegar kaupi sér áfenga drykki fyrir morgunflug segir Sigurður að bjór seljist á öllum tímum en mun minna á morgnana en meira þegar líður á daginn.