Hálka á Reykjanesbraut og Grindavíkurvegi – Suðurstrandarvegur ófær
Hálkublettir eru á Reykjanesbraut og Grindavíkurvegi og ófært er á Suðurstrandarvegi, en unnið er að hreinsun samkvæmt tilkynningu frá Vegagerðinni. Greint hefur verið frá því í ferðaþjónustuhópum á samfélagsmiðlinum Facebook að ferðamenn hafi átt í vandræðum með að komast leiðar sinnar á Suðurstrandarvegi undanfarið vegna hálku.
Lítil vetrarþjónusta er á Suðurstrandarvegi, en vegurinn er að jafnaði hreinsaður 1-2 í viku. Að mati Grindavíkurbæjar ætti Suðurstrandarvegur að vera með vetrarþjónustu 5 daga vikunnar, miðað við umferð, sem hefur aukist mikið undanfarin ár.
“Vegna tíðra lokana Suðurlandsvegar á Hellisheiði og í Þrengslum er mjög brýnt að hafa möguleika á að beina umferð um Suðurstrandarveg. Lokanir á Suðurlandsvegi hafa mikil og neikvæð áhrif á íbúa og fyrirtæki á svæðinu og nauðsynlegt að hafa aðra leið færa á milli Suðurlands og höfuðborgarsvæðisins/Suðurnesja.” Segir í bókun bæjarstjórnar Grindavíkur frá því á síðasta ári.