Velta á Grindavíkurvegi og útafakstur á Reykjanesbraut
![logreglan bill](https://i2.wp.com/www.sudurnes.net/wp-content/uploads/2015/08/logreglan-bill1.jpg?resize=620%2C264)
Nokkuð var um umferðaróhöpp í umdæmi lögreglunnar á Suðurnesjum í vikunni. Bílvelta varð t.d. á Grindavíkurvegi þegar ökumaður ók út á vegöxl og missti við það stjórn á bifreiðinni. Hún fór tvær veltur og staðnæmdist á hvolfi. Einn farþegi var í bílnum og virtist hann hafa sloppið með minni háttar meiðsl og ökumaðurinn ómeiddur. Engu að síður voru þeir báðir fluttir með sjúkrabifreið á Heilbrigðisstofnun Suðurnesja til skoðunar.
Þá missti annar ökumaður stjórn á bifreið sinni á Reykjanesbraut með þeim afleiðingum að hún hafnaði á víravegriði. Ökumaðurinn fann til verkja eftir óhappið og var fluttur á HSS með sjúkrabifreið. Töluverðar skemmdir urðu á bifreiðinni og vegriðinu.