Vara við ofsaveðri – Vegagerðin varar sérstaklega við aðstæðum á Reykjanesbraut
Veðurstofan varar við ofsaveðri í nótt og í fyrramálið. Á vef Veðurstofunnar kemur fram að á Reykjanesskaga megi búast við að vindhraðinn í fyrramálið verði á bilinu 23-28 m/s, sem gæti mögulega leitt til truflana á flugi. Vindhraði í verstu hviðunum getur svo náð allt að 35-40 m/s.
Þá hefur Vegagerðin séð ástæðu til að vara sérstaklega við aðstæðum á Reykjanesbraut á milli kl. 09 og 11, þar sem vindur þvert á veginn verður 22-25 m/s með hviðum 35 m/s. Slagveðursrigning á sama tíma og vatn í hjólförum.
Fólki er bent á að huga að lausamunum þegar tvær óveðurslægðir fara yfir landið næsta sólarhringinn. Allmikið lægðardrag með roki og rigningu fer yfir Suður- og Vesturland í nótt.