Hlévangur opnar eftir endurbætur

Hjúkrunarheimilið Hlévangur við Faxabraut í Keflavík hefur nú opnað dyr sínar á nýjan leik eftir gagngerar endurbætur.

Húsnæðið hefur nú fengið nýtt hlutverk sem skammtímahjúkrunarheimili, þar sem markmiðið er að létta álagi á heilbrigðisþjónustu.

Þrír einstaklingar hafa þegar flutt inn á Hlévang og er gert ráð fyrir að þeim fjölgi á næstunni.

„Það er mikið ánægjuefni að sjá Hlévang opna aftur og vita að þar muni fólk fá þá umönnun og hlýju sem það á skilið. Ég vil þakka öllum þeim sem komu að verkefninu fyrir að hafa náð þessum mikilvæga áfanga á skömmum tíma,“ segir Vilhjálmur Árnason, bæjarstjóri Reykjanesbæjar.

Með starfseminni verður hægt að létta álagi af Landspítala og heilbrigðisþjónustu á Suðurnesjum, meðal annars vegna einstaklinga sem hafa beðið eftir hjúkrunarrými á annarri hæð sjúkrahússins í Keflavík.

Reykjanesbær er eigandi húsnæðisins og hefur gert samning við ríkið um leigu þess til tveggja ára, með möguleika á framlengingu. 

Samkomulagið gerir kleift að nýta húsnæðið áfram í þágu mikilvægrar heilbrigðisþjónustu á Suðurnesjum. 

Undanfarna mánuði hefur verið unnið að umfangsmiklum endurbótum á Hlévangi til að laga húsnæðið að nýju hlutverki.

Kostnaður við breytingarnar, ásamt kaupum á nýjum húsgögnum og rúmum, nemur á annað hundrað milljónum króna. Ráðuneytið stóð straum af kostnaði við endurbæturnar en rekstur heimilisins er fjármagnaður af heilbrigðisráðuneytinu og verður í höndum Heilbrigðisstofnunar Suðurnesja.