Nýjast á Local Suðurnes

Jólaljósin á vinabæjarjólatrénu í Reykjanesbæ tendruð á sunnudag

Boðið verður upp á skemmtidagskrá og heitt kakó og piparkökur þegar ljósin verða kveikt á jólatrénu á Tjarnargötutorgi í Reykjanesbæ á sunndudaginn.

Það er Leonard Ben Evertsson nemandi úr 6. bekk Akurskóla sem fær þann heiður að kveikja ljósin á jólatrénu á Tjarnargötutorgi sem er að venju gjöf frá Kristiansand í Noregi, vinabæ Reykjanesbæjar. Jóhann Friðrik Friðriksson, forseti bæjarstjórnar, veitir trénu viðtöku fyrir hönd íbúa og ávarpar viðstadda.

Blásarasveit frá Tónlistarskóla Reykjanesbæjar leikur jólalög við tréð á meðan gesti drífur að og dýrin í Hálsaskógi, sem öll börn í bænum elska, eru nú komin í jólaskap og koma fram sem Jóladýrin í Hálsaskógi og ætla að skemmta börnunum eins og þeim er einum lagið. Þá koma jólasveinar í heimsókn og dansa í kringum tréð.

Dagskráin hefst kl. 17 og verður lokið kl. 18.