Vara við leiðindar veðri í nótt – Hálka á Reykjanesbraut
Veðurspá Veðurstofu Íslands í dag og nótt gerir ráð fyrir sunnan og síðar suðaustan 8-15 metrum á sekúndu og dálitlum éljum, þurru að mestu um landið, en slyddu eða rigningu með köflum sunnantil.
Mjög djúp lægð nálgast landið í kvöld úr suðri með ört vaxandi austan átt og fer hún allhratt norður yfir land í nótt. Aðal vindstrengur þessarar lægðar er austan við lægðarmiðjuna og gera nýjustu spár ráð fyrir að vindstrengurinn nái inn á landið austanvert með sunnan roki og sums staðar fárviðri við austurströndina í nótt.
Í viðvörun á vef Veðurstofunnar segir að mikilvægt sé að fylgjast með veðurspám því ekki þarf braut lægðarinnar að breytast mikið til þess að miklar breytingar verði á veðurspám.
Þá segir á vef Vegagerðarinnar að hálka sé á Reykjanesbraut og snjóþekja á Suðurnesjum.