Telja ekki heimilt að fella niður vexti Grindvíkinga
Lífeyrissjóðurinn Gildi, sem er með stærsta hluta lífeyrissjóðslána í Grindavík, ætlar ekki að fella niður vexti og verðbætur af húsnæðislánum íbúa í Grindavík vegna jarðhræringa sem þar hafa orðið.
Í tilkynningu segir að niðurstaða lögfræðistofunnar LEX, sem vann álitsgerð fyrir sjóðinn, sé afdráttarlaus um að sjóðnum sé ekki heimilt að afskrifa vexti og verðbætur með almennum hætti hjá lántökum.
Í tilkynningu frá lífeyrissjóðnum segir að sjóðurinn muni meta stöðu einstakra lántakenda sjóðsins frá Grindavík og skoða sérstaklega hvernig hægt sé að koma til móts við þá sem höllum fæti standa út frá greiðslugetu og veðstöðu.