Segja upp og endurnýja ekki leigusamninga sem eru við það að renna út
Til stendur að setja töluverðan fjölda eigna leigufélagsins Heimstaden á sölu, þar á meðal eigir á Suðurnesjum, flestar á Ásbrú.
Þannig hafa leigjendur hjá félaginu fengið uppsögn á leigu með 12 mánaða uppsagnarfresti, auk þess sem sudurnes.net hefur heimildir fyrir því að aðrir fái leigusamninga sem eru við það að renna út ekki endurnýjaða, en eignirnar fara á sölu að þeim tíma liðnum.
Framkvæmdastjóri félagsins segir nokkra leigjendur hafa lýst yfir áhuga á að kaupa þær íbúðir sem þeir leigja nú auk þess sem fyrirtækið hafi hug á að selja eignir til fyrirtækja sem muni leigja þær áfram.
“Við byrjuðum á að segja upp leigusamningum fyrir stakar eignir ásamt einu heilu húsi. Flestar þessar eignir eru fjármagnaðar á óverðtryggðum vöxtum sem fóru yfir 11% eftir síðustu stýrivaxtahækkun, en eignirnar gefa undir 4% arðsemi frá rekstrinum,“ segir Egill í samtali við Viðskiptablaðið, sem fjallar ítarlega um málið í dag.