Gult í kortunum með kvöldinu
Veðurstofan hefur enn á ný gefið út gular viðvaranir, þar á meðal fyrir Suðurnesjasvæðið.
Viðvaranir gilda frá klukkan 18 fyrir höfuðborgarsvæðið, Suðurland, Faxaflóa, Breiðafjörð og Vestfirði.
Mikilli ölduhæð er jafnframt spáð á miðunum suðvestur- og vestur af landinu, allt að 18 metrum. Þetta hefur áhrif á tvö spásvæði, Faxaflóa og Suðurland. Reikna má með að ölduhæð við ströndina nái 10-12 metrum og hún nái hámarki á mánudagskvöld. Búist er við að ástandið vari fram á þriðjudag.
Spáð er suðvestan 13 til 20 metrum á sekúndu og talverðum éljum. Viðbúið er að hvassara verði í éljahryðjum og gætu vindhviður farið yfir 35 metra á sekúndu staðbundið. Skafrenningur verður og auknar líkur á eldingum. Líkur eru á samgöngutruflunum og foktjóni, að því er kemur fram á vef Veðurstofunnar.