Yfir 30 milljónir söfnuðust á Góðgerðarfesti Blue

Góðgerðarfest Blue Car Rental var haldið í reiðhöll Hestamannafélagsins Mána í sjötta sinn þann 18. október síðastliðinn og sló öll fyrri met.

Tónlist, gleði og samhugur voru í forgrunni og eins og nafnið gefur til kynna er markmið hátíðarinnar einfalt, að safna fjármunum til góðra mála.

Frá því hátíðin var fyrst haldin fyrir fimm árum hefur hún stækkað með hverju árinu og í þetta sinn mættu um 900 manns til að taka þátt. Þá voru rúmlega 100 fyrirtæki og einstaklingar sem styrktu verkefnið og söfnuðust yfir 30 milljónir króna sem munu renna til 25 málefna.

Blue Car Rental vill senda innilegar þakkir til fyrirtækja, félaga, listamanna, sjálfboðaliða, gesta og allra þeirra sem tóku þátt í að gera Góðgerðarfest 2025 að ógleymanlegri hátíð, segir í stöðufærslu fyrirtækisins á Facebook.