Stefna á allt að 10 milljarða framkvæmdir

Nýr 390 metra viðlegukantur og birgðageymsla fyrir 25 þúsund rúmmetra af skipaeldsneyti verður byggð í Helguvík, gangi sameiginlegt verkefni íslenskra stjórnvalda og Atlantshafsbandalagsins sem fjármagnar framkvæmdirnar eftir.

Áætlað er að fjárfesting bandalagsins geti numið allt að tíu milljörðum króna, að því er segir í tilkynningu frá stjórnvöldum.

Þorgerður Katrín Gunnarsdóttir utanríkisráðherra, Kjartan Már Kjartansson, bæjarstjóri í Reykjanesbæ og Halldór K. Hermannsson, hafnarstjóri Reykjaneshafnar, undirrituðu í morgun viljayfirlýsingu um þessa fyrirhuguðu uppbyggingu mannvirkja í Helguvík.

Nú stendur yfir undirbúningsvinna og hönnun umræddra mannvirkja í Helguvík sem jafnframt geta nýst í borgaralegum tilgangi. Stefnt er að því framkvæmdir hefjist síðla árs 2026 og þeim ljúki árið 2029.