Nýjast á Local Suðurnes

Byggingafulltrúi sendur í leyfi á meðan Helguvíkurmál er í skoðun

Byggingafulltrúi Reykjanesbæjar hefur verið sendur í leyfi á meðan mál sem snúa að of háum byggingum kísilvers United Silicon í Helguvík eru í skoðun, þetta herma öruggar heimildir Suðurnes.net.

Guðlaugur Helgi Sigurjónsson, framkvæmdastjóri umhverfis- og skipulagssviðs Reykjanesbæjar staðfesti að byggingafulltrúinn væri í leyfi, en vildi að öðru leyti ekki tjá sig frekar um málið.

Forsaga málsins er sú að á dögunum kom í ljós að tvær byggingar verksmiðjunnar eru hærri en deiliskipulag gerir ráð fyrir, loftsíunarhús er rúmir þrjátíu metrar og pökkunarstöð er rúmir þrjátíu og átta metrar, eða þrettán metrum hærri en hún má vera.

Ásdís Hlökk Theodórsdóttir, forstjóri Skipulagsstofnunar, sagði á dögunum að slíkar breytingar væru klárt lögbrot, á ábyrgð Reykjanesbæjar, en engin viðurlög eru þó við brotum sem þessum.