Bæjarráð Reykjanesbæjar: Nauðsynlegt að stöðva rekstur verksmiðju USi hið fyrsta

Myndin tengist fréttinni ekki beint

Bæjarráð Reykjanesbæjar telur nauðsynlegt, eftir að hafa rætt við forsvarsmenn United Silicon, að stöðva þurfi rekstur kísilmálmverksmiðju fyrirtækisins í Helguvík hið fyrsta, þar sem fyrirsjáanlegt er að mengun muni enn berast frá verksmiðjunni. Þetta kemur fram í bókun með fundargerð bæjarráðs, sem samþykkt var samhljóða.

Bókun bæjarráðs í heild sinni:

„Kísilmálmverksmiðja Sameinaðs sílikon hf. hefur nú verið starfrækt í 9 mánuði án þess að tekist hafi að stöðva mengun frá verksmiðjunni en mengun sem þessi gengur þvert á forsendur starfsleyfis verksmiðjunnar.

Hluti íbúa Reykjanesbæjar hefur ítrekað orðið fyrir verulegum óþægindum og vanlíðan vegna þess og slíkt er með öllu ólíðandi.

Í samtölum við forsvarsmenn fyrirtækisins hefur komið fram að nú liggi fyrir listi yfir atriði sem enn þarfnast lagfæringar og úrbóta sem taka mun vikur eða jafnvel mánuði að hrinda í framkvæmd.

Að óbreyttu má því búast við áframhaldandi mengun frá verksmiðjunni með tilheyrandi óþægindum fyrir íbúa.

Í ljósi þessa telur bæjarráð Reykjanesbæjar nauðsynlegt að rekstur verksmiðjunnar verði stöðvaður hið fyrsta, á meðan unnið er að nauðsynlegum úrbótum, svo koma megi í veg fyrir áframhaldandi mengun.“