Áfram landris og kvikusöfnun

Landris og kvikusöfnun undir Svartsengi heldur áfram. Hraði kvikusöfnunar hefur haldist nokkuð stöðugur undanfarnar tvær vikur, segir í tilkynningu frá Veðurstofunni.

Líkanreikningar gera ráð fyrir að á milli 16 og 17 milljón rúmmetrar af kviku hafi safnast undir Svartsengi frá síðasta eldgosi í júlí. Þá segir að magn kviku sem hljóp úr Svartsengi yfir í Sundhnúksgígaröðina í eldgosinu sem hófst 16. júlí var áætlað um 11 – 13 milljón rúmmetrar. Miðað við reynslu af eldgosum á Sundhnúksgígaröðinni er gert ráð fyrir að líkurnar á nýju kvikuhlaupi og eldgosi aukist þegar um það bil jafn mikið magn af kviku hefur safnast aftur undir Svartsengi og hljóp þaðan í atburðinum á undan.