Vilja endurskoða samninga vegna þjónustu við umsækjendur um alþjóðlega vernd

Hera Ósk Einarsdóttir, sviðsstjóri velferðarsviðs fór yfir núgildandi samning Reykjanesbæjar við Útlendingastofnun um þjónustu við umsækjendur um alþjóðlega vernd á fundi Velferðarráðs Reykjanesbæjar á dögunum, en hún leggur til að samningurinn verði endurskoðaður.

Hera Ósk Einarsdóttir

Hera Ósk leggur til að óskað verði eftir endurskoðun á fyrirliggjandi samningi Reykjanesbæjar og Útlendingastofnunar í ljósi samnings Útlendingastofnunar og Reykjavíkurborgar sem undirritaður var í mars síðastliðnum, en að mati Heru Óskar eru nokkur ákvæði í þeim samningi sem gefa tilefni til endurskoðunar meðal annars vegna breyttrar kostnaðarskiptingar Útlendingastofnunar og þjónustusveitarfélaga.

Þjónustan sem Reykjavíkurborg hefur verið að veita umsækjendum um alþjóðlega vernd hefur verið á svipuðum nótum og sú þjónusta sem veitt er í Reykjanesbæ, en það felur meðal annars í sér að sjá til þess að umsækjendur fái framfærslu, hafi aðgang að almenningssamgöngum, nauðsynlegri heilbrigðisþjónustu, tækifæri til menntunar, frístunda og virkni, fái þjónustu túlka þegar við á og fleira.

Velferðarráð leggur til að endurskoðun fari fram á samningum miðað við þjónustu við óbreyttan fjölda umsækjenda.