Foreldrar og iðkendur moka snjóinn – Vill fjárfesta í tækjabúnaði

Alexander Ragnarsson, Sjálfstæðisflokki, lagði fram bókun á fundi bæjarstjórnar í gær varðandi snjómokstur á nýlegum gervigrasvelli í Reykjanesbæ, en þar kemur fram að foreldrar ásamt iðkendum og stjórnendum hafi séð um snjóhreinsun eftir að verktaki sagði upp samningi á síðasta ári.

Alexander leggur til að strax verði farið í að kanna hvort hægt sé að semja við verktaka sem fyrst eða hvort fjárfesta skuli í eigin tæki, þar sem þau áhöld sem notuð eru nú geti valdið skemmdum á grasinu.

Bókun Alexanders í heild:

Reykjanesbær tók í notkun nýjan gervigrasvöll í byrjun október 2021. Samið var við verktaka um að hreinsa snjó af vellinum en í september 2024 sagði verktakinn upp samningunum og hefur ekki verið nein vetrarþjónusta við völlinn síðan.

Iðkendur, foreldrar og stjórnendur hafa unnið að snjóhreinsun síðan þegar þörf hefur verið á og notað til þess verkfæri sem að mati allra þeirra sem til þekkja, geta verið skaðleg fyrir gervigrasið. Beiðni liggur fyrir að skoðað verði að fjárfesta í eigin tæki, sem gæti nýst að auki við snjómokstur á fleiri stöðum.

Sjálfstæðisflokkurinn leggur til að strax verði farið í að kanna hvort hægt sé að semja við verktaka sem fyrst eða hvort fjárfesta skuli í eigin tæki. Ekki sé hægt að bíða eftir fjárhagsáætlun og nýju ári, til umbóta, enda ekki hægt að treysta á að það verði óafturkræf skemmd á grasinu með notkun á ófullnægjandi búnaði við snjóhreinsun.