Unnu dómsmál vegna sandfoks
Grindavíkurbær og Sjóvá töpuðu á dögunum dómsmáli vegna tjóns af völdum sandfoks sem varð á árunum 2012 til 2019 frá bílaplani við íþróttamiðstöðina í Grindavík, en planið var á þeim tíma ómalbikað. Sandfokið olli tjóni á bifreiðum í eigu fyrirtæks sem staðsett er við sömu götu og íþróttamiðstöðin. Eigendur fyrirtækisins fóru einnig fram á miskabætur vegna fasteignar, en þeirri kröfu var hafnað.
Tjónaþolar kröfðu bæinn um 29,3 milljónir króna vegna þrifa innan- og utanhúss og byggðu kröfu sína á vottorðum frá Veðurstofu Íslands, þar sem tilteknir voru dagar og tímabil frá 26. janúar árið 2012 til 21. október 2019. Í niðurstöðu Landsréttar var staðfest sú niðurstaða héraðsdóms að með athafnaleysi við að bregðast við sandfoki af bílaplaninu hefði Grindavíkurbær sýnt af sér saknæma og ólögmæta háttsemi gagnvart fyrirtækinu og eigendum þess, sem bjuggu í sama húsnæði. Þá var staðfest niðurstaða héraðsdóms um að fjárkröfur fyrirtækisins vegna annarra bifreiða en einnar væru fyrndar, segir meðal annars í dómsorði.
Grindavíkurbæ og Sjóvá Almennum var gert að greiða fyrirtækinu 3,4 milljónir króna með dráttarvöxtum en auk þess skal Grindavíkur ásamt Sjóvá Almennum greiða fyrirtækinu 338 þúsund krónur með dráttarvöxtum. Grindavíkurbær var hinsvegar sýknaður af miskabótakröfum sem hljóðuðu upp á tæpar 30 milljónir króna.