The post FöstudagsÁrni: Hvað gerist á Sirkussýningu fyrir fullorðna? appeared first on Local Sudurnes.

Nú þurfum við að setjast niður og endurskoða útlendingalög, þátttöku okkar í sáttmálum og framvegis. Í landinu eru erfiðir hælisleitendur sem hafa að hluta til gist í Reykjanesbæ við litla hrifningu íbúa. Áreiti í strætó og í sundi, búðaþjófnaður og fleira sem þessir einstaklingar tengjast og nú síðast hafði sérsveitin afskipti af hælisleitenda á Kjalarnesi. Sumir vilja ekki vera hérna og hafa reynt að smygla sér um borð í flutningaskip, en við höldum sem fastast í þessa einstaklinga. Á sama tíma erum við að stíja í sundur fjölskyldur. Í síðustu viku var karlmaður rifinn úr faðmi fjölskyldu sinnar, konu og tveggja barna og sendur úr landi. Í þessari viku var karlmanni sem giftur er íslenskri konu og á með henni tvö börn, hafnað um ríkisborgararétt. Ástæðan var að hann var tekinn fyrir of hraðan akstur. Þetta kerfi er ekki að ganga upp og tímabært að fá heildarsýn á málið með mannúð að leiðarljósi, þetta er orðið hálf kjánalegt fyrir orðstýr landsins út á við. Að veita ekki giftum einstaklingi sem búið hefur hérna í 11 ár ríkisborgararétt vegna hraðasektar er efni í grín í bandarískum grínþætti, hvað þá þegar hraðasektirnar tilheyra maka þínum.

Ég verð að fara að stunda landsleikina, það eru ennþá nokkrir kroppar á lausu og þeir elstu byrjaðir að detta inn á markaðinn aftur. Það er algjör óþarfi að skila þeim þegar þeir detta út úr hópnum. Ég sé það að ég hefði átt að nema íþróttasálfræði.
Annars er búið að vera frekar rólegt þessa vikuna, hálfgerð gúrkutíð, svo rólegt að birt var frétt um einhverja unga konu sem er með 15.000 fylgjendur á instagram. Sá ekki tilganginn í þeirri frétt, enda með þeim lélegri sem ég sá. Svo til að toppa daufleikann í fréttamennskunni var fjallað um það í kvöldfréttum Stöðvar 2 að viðskiptajöfrar landsins búa einna helst í Garðabæ eða á Seltjarnanesi. Þurfti virkilega að rannsaka málið eitthvað sérstaklega? Án efa voru einhverjir á ríkisstyrk að rannsaka bú eftir efnahag. Vitið þið til þess að mikið af efnameira fólki búi í Fellunum? Ég þekki engan ríkan í Fellunum þótt ég þekki þar mikið af góðu fólki. Það eru engin vísindi að hverfin endurspegla með einhverjum hætti efnahang íbúanna.

Framtalsseðlarnir streymdu til landsmanna í vikunni. Margir brostu út að eyrum, en aðrir ekki. Það sem kemur mér alltaf spánskt fyrir sjónir, er að oftar en ekki lenda þeir sem minnst eiga á milli handanna í að endurgreiða. Hvernig stendur á því þunglamalega bótakerfi sem öryrkjar og ellilífeyrisþegar búa við, og lenda margir hverjir í að skulda – bæturnar eru vart að duga fyrir salti í grautinn, en alltaf tekst ríkinu að kroppa til baka. Annað sem fer fyrir brjóstið á mér og það er að framtal einstaklinga liggi frammi, rétt eins og gömul Séð & Heyrt blöð á biðstofum. Það ríkir launaleynd í landinu og persónuvernd. Pétur heitinn Blöndal þingmaður kom vel að orði þegar hann sagði að tekjurnar skipta engu máli, það eru skuldirnar. Þetta er laukrétt hjá honum því tekjur verða að duga fyrir skuldum og lífsviðurværinu. Þótt nágranninn þinn sé með 2 milljónir á mánuði og þú ert grænn úr öfund þá er ekki þar með sagt að hann sé með meira fé á milli handanna. Við erum skrítin á mörgum sviðum og þetta er ein hliðin, ölum á öfund og bölsýni yfir launum annarra í stað þess að standa okkur vel og gera það besta úr því sem við höfum, við græðum ekkert á að velta okkur upp úr tekjum annarra.

Góða helgi.

The post FöstudagsÁrni: “Ég hefði skammast mín, dröslast í flíkurnar og komið mér út!” appeared first on Local Sudurnes.

Ung stúlka mótmælti náðun forseta Íslands á kynferðisafbrotamann sem hafði misnotað hana. Í framhaldinu af náðun forsetans fær viðkomandi maður lögmannsréttindi sín að nýju. Tilfinningarnar segja þetta mál vera svívirðilegt, en það er svo að refsingar á Íslandi eiga að vera betrun í von að við skilum einstaklingunum sem betri mönnum út í samfélagið aftur – en auðvitað eru skoðanirnar misjafnar í þessu máli. Það versta við þetta er að Guðni forseti kom í viðtal vegna málsins og má segja að viðtalið hafi verið það versta sem hann hefur farið í. Í fyrsta lagi reynir forsetinn að firra sig ábyrgð með því að vitna í stjórnarskránna, í öðru lagi segist hann ekki hafa vitað hverjum hann var að veita uppreist æru, og í þriðja lagi sagði forseti Íslands að best væri að loka kynferðisafbrotamenn inni og henda lyklinum. Hvaða Trump hljóp í forsetann? Enn og aftur sjáum við að það er ekki nóg að kjósa einstakling á Bessastaði sem heldur að embættið gangi út á að klappa krökkum á kollinn, sækja pizzuna sína sjálfur og kasta brauðmolum í hausinn á öndum.

Algjör snilld sem ég sá í fréttum í vikunni, nágranninn minn í Grafarvogi sem leigir út jepplinginn sinn. Nei ekki til að aka honum, heldur til að gista í honum. Þessi snjalli einstaklingur kann að bjarga sér. Það geta tveir gist í einu í jepplingnum og hægt er að bóka rómantískt bílakúr á AirBnB. Nú er bara spurning hvort þessi hugmyndaríki einstaklingur sé ekki búinn að leysa húsnæðisvandann í borginni. Borgarstjórnarmeirihlutinn í 101 lítur á það sem niðurlægjandi þróun að reisa byggðir í efri hverfum Reykjavíkur, en má þá ekki henda ónýtum bílflökum á auðar lóðir í Úlfljótsárdal? Nýtum innviðið sem fjárfest hefur verið í hverfinu, ungt fólk kemur sér þægilega fyrir í bílflökunum og nýtur lífsins. Auðvitað er ekki hægt að koma í veg fyrir stéttaskiptingu, þar sem eitthvað af ungu fólki á kannski afa sem á Landcruzer eða jafnvel gamlan Ford Van sem má leggja til hinstu hvílu á auðum lóðum. En svo eru aðrir sem fá bara Yaris. En svona gengur lífið fyrir sér við getum nefnilega aldrei verið alveg jöfn að gæðum né heilsu, ekki láta sannfæra ykkur um það.

Eflaust rétt að velta fyrir sér þessa vikuna hvers vegna virðing almennings í garð Alþingis sé svo lág. Varaþingmaður pírata hvatti almenning til að hringja í neyðarlínuna í hvert skipti sem vopnaður sérsveitamaður sæist á ferli. Til þess eins að mótmæla bættu öryggi almennings. Varaþingmaðurinn hefur eflaust fengið símtal frá uppstökkri Birgittu því hann dróg þetta til baka og spurði hvort það mætti ekki grínast á netinu. Kæri varaþingmaður ef við vildum fyndna þingmenn hefðum við hvatt Ara Eldjárn til að gefa kost á sér, þú ert ekkert fyndinn herra pírati.

Ég var gapandi hissa þegar ég sá fylgisaukningu Samfylkingarinnar í nýrri skoðunarkönnun. Þetta kom á óvart enda flokkurinn í molum, helstu hákarlarnir horfnir úr þingflokknum sem kæmist vel fyrir á einu gestasalerni í partýi. En svo skrallaði ég neðar á miðlunum og áttaði mig á skýringunni á auknu fylgi, það fundust tvö ný kuml í vikunni.

Dagur B. Eggertsson, borgarstjóri gefur kost á sér til endurkjörs næsta vor. Ég var ekki viss um hvort ég ætti að hlæja eða gráta. Ég byrjaði á að flissa, en þá poppaði upp í hugan viðtal sem ég sá í 60 mínútum fyrir nokkru síðan. Þar var fjallað um mexikana sem búið hafði í Bandaríkjunum um árabil, giftur með börn og rak vinsælan veitingastað. Nema að hann var ekki með bandarískan ríkisborgararétt. Þess vegna fór hann til sýslumanns reglulega til að tjékka sig inn. Hann, fjölskyldan og starfsfólkið á veitingastaðnum kusu öll Trump til forseta því þau vildu ólöglega innflytjendur úr landi. Það fyrsta sem gerðist eftir að Trump komst til valda var að vísa þessum tiltekna mexikana úr landi. Fjölskyldan situr eftir með sárt ennið. Þessi litla saga segir að stundum geta kjósendur kosið gegn sjálfum sér. Vona bara að borgarbúar hugsi sig vel um í kjörklefanum að ári, ekki vera mexikanar elskurnar.

Brandari vikunnar er sá að Gunnar Smári sósíalisti og baráttumaður litla mannsins, baráttumaður gegn spillingu, baráttumaður gegn stéttaskiptingu og misskiptingu lífsgæða á 125 milljón króna einbýlishús. Á sama tíma og starfsfólkið hans fær ekki útborgað, á sama tíma og fjölmiðlaveldið hans er tekið til gjaldþrotaskipta, þá situr hann eins og prins í rándýra einbýlishúsinu, „já þetta gekk ekki upp, best að láta almúgan kjósa mig á þing,“ hugsar hann og hallar sér aftur í hægindastólnum í stóru stofunni sinni. Já sannkallaður talsmaður jöfnunar í samfélaginu.

Góða helgi

The post FöstudagsÁrni: “Þú ert ekkert fyndinn herra Pírati” appeared first on Local Sudurnes.

Lekamálið mikla í innanríkisráðuneytinu er enn mörgum í fersku minni, þótt rykið sé fallið til jarðar. Enn dynur á okkur lekamál og enn alvarlegra. Þvagleki í Morgunblaðshöllinni og það beint í ruslatunnur á fyrstu hæðinni. Þessi mikla plága hefur valdið tölvupóstsendingum sem hafa einnig lekið, bara ekki í ruslatunnuna heldur til samkeppnisaðila. Málið er litið alvarlegum augum og spurning hvort Kári Stefánsson verði kallaður til og þvagprufa tekin til að komast í botns í málinu.

Sjómannasunnudagurinn fór fram um síðustu helgi Ég hugsaði með mér að nú hlyti þjóðin að fjölmenna á hátíðir og hafnarbakkinn í Reykjavík yrði vinsæll. Þess vegna ákvað ég að hoppa í Costco og fá næði til að skoða mig um og grípa með mér jarðaber. Nei ég las vitlaust í stöðuna og það liggur fyrir að réttast væri að kasta upp hoppuköstulum á Kauptúni og kasta fjallkonunni upp á fílinn í Costco á sjálfan þjóðhátíðardaginn á morgun. Þjóðin er í Costco. Costco er komið með 25% markaðshlutdeild á eldsneytismarkaðnum í landinu með eina bensínstöð og spurning hvort Garðabær hendi ekki upp vegaslóðum í móann og þar rísi hjólhýsahverfi. Það dregur úr bílaumferð, mengun og leysir húsnæðisskortinn í borginni.

Viljum við sykurskattinn aftur ? Mitt svar er nei, ég er ekki á því að rétta leiðin að bættri lýðheilsu sé í gegnum skattheimtu. Sykur er í mörgum tilfellum fíkn og við vitum að áfengissjúklingar hætta ekki að drekka þrátt fyrir hækkun í Vínbúðunum. Lýðheilsa næst með samstilltu átaki sem birtist í fræðslu, hvatningu til hreyfingar og að neytendur séu meðvitaðir um heilsusamlegra líferni. Við eigum frekar að setja lög sem banna sykursprautun í matvælaframleiðslu, beikon, kjúklingabringur og annað er til að mynda sykursprautað. Já og það sem er ekki sykursprautað er oftar en ekki dýrara. Þannig leiða þeir neytendur í sykurgildruna. Byrjum á að draga úr sykri í matvælaframleiðslu, sérmerkjum vörur með varnaðarorðum um sykurinnihald, beinum fólki á beinu brautina, hærri skattar bera bara í skauti sér meiri kostnað hjá ómeðvituðum neytendum sem oftar en ekki gera sér ekki grein fyrir öllum þeim sykri sem er lætt í matvælin með blekktum innihaldslýsingum.

Það er ömuleg staðreynd að hryðjuverkaárásirnar í Evrópu eru okkur óþægilega nálægar. Sama hvort við séum stödd erlendis eða hér heima. Ég heyrði konu í útvarpsviðtali sem sagði frá því að hún hafi verið stödd með barnabarninu sínu á sama stað og hryðjuverkið átti sér stað í Stokkhólmi, en bara deginum áður. Þarna hefði hún og barnabarnið hennar auðveldlega getað verið fórnarlömb. Tala nú ekki um mæðgurnar á tónleikunum í Manchester. Ríkislögreglustjóri greindi frá því í vikunni að það eru einstaklingar staddir á landinu sem eru undir eftirliti, þeir voru það líka flestir sem hafa framið ódæðin. Mannréttindasáttmáli Sameinuðu þjóðana og löggjöf eru með þeim hætti að ekkert er hægt að gera fyrr en brotið er framið. Að stjórnmálamenn séu að mótmæla auknu öryggi borgara er vægast sagt einkennilegt. Sérsveitin fylgdist með Color run og borgarstjóri er gáttaður yfir því að hann hafi ekki verið látinn vita. Þarf ríkislögreglustjóri leyfi borgarstjóra til að sinna verkefnum sínum ? Ef það er skotárás, þarf þá fyrst leyfi herra borgarstjóra til að grípa til aðgerða? Ætlar borgarstjóri þá að axla ábyrgð ef til árásar kæmi? Alheimurinn er lítill, flæði fólks landa á milli er mikið og landamæri alltof mikið opin. Við ættum að rífa upp, breyta löggjöf á þann hátt að við getum vísað úr landi fólki sem við teljum að stafi ógn af. Leyfum löggæslufólki að meta ástandið og vinna út frá því, þetta snýst ekki um pólitík, heldur um landsmenn.

Margrét Pála Ólafsdóttir frumkvöðull Hjallastefnunnar er snillingur. Á meðan stjórnmálamenn þrasa með og á móti einkarekstri í skólakerfinu hefur hún sýnt fram á gríðalegan árangur í rekstri sínum. Nú síðast var hún í fréttum með einkarekinn grunnskóla á landsbyggðinni sem blómstrar eins og falleg Hansarós við húsvegg í Grafarvoginum. Ánægja nemenda hefur stóraukist, einkunnir rjúka upp, nemendur koma mun betur undirbúin inn í framhaldsnámið, hvað viljum við meira? Margrét Pála hefur sannað það fyrir stjórnmálamönnum sem þrasa út í eitt og hafa gert það áratugum saman að grótgróna skólakerfið þar sem engu má breyta, nema jú launum kennara, er fúið eins og gamall ruggustóll á háalofti. Hættið þessu röfli, breytið, bætið og þá verða allir sáttir þegar árangurinn skilar sér.

The post FöstudagsÁrni spyr: Þarf Ríkislögreglustjóri leyfi borgarstjóra til að sinna verkefnum sínum? appeared first on Local Sudurnes.

Viðreisn og Björt framtíð eru gegnar til liðs við Dag Eggertsson borgarstjóra. Ráðherrar flokkana funduðu með borgarstjóra þar sem húsnæðisstefna var kynnt, án samskipta við Sjálfstæðisflokkinn. Það liggur fyrir að flokkarnir ætla í Reykjavíkurlistaframboð með Samfylkingunni og nú á að nota kraftinn til að halda Degi við völd í Reykjavík. Þessir þrír flokkar búa við mikið fylgistap og telja greinilega styrk í því að halda Degi á floti og Gísli Marteinn verður án efa forseti borgarstjórnar. Það verður fróðlegt að sjá hvort borgarbúar falla fyrir töfrabrögðum flokkana sem heyja lífróður sinn í íslenskum stjórnmálum,

Ísbúðir borgarinnar eru troðfullar, enda komið sumar. Unglingarnir sem þar vinna standa í ströngu að moka ísmeti í mannskapinn og standa sig vel. Ég lagði leið mína í eina slíka ísbúð í vikunni með góðri vinkonu. Biðin var talsverð enda fæstir í gamla góða ís í brauðformi eins og áður var. Núna grípur mann hálfgerður valkvíði þegar horft er á úrvalið. Við vorum búin að bíða dágóða stund, en loksins voru tvö númer á undan okkur. Kallað er upp 90 en þá voru sex guttar með sama númerið, hálf ísbúðin ruddist að afgreiðsluborðinu. Nú jæja hugsaði ég með mér og sá fram á að 92 (okkar númer) væri skammt undan. En þá er kallað upp 91 og þar eru fjórar stelpur sem voru með sama valkvíða og ég. Urður Aska vildi Huppuljúfmeti með jarðaberjum, Trumpa Eik vildi eitthvað annað og Loppa Lúða var í vandræðum með að ákveða sig. Það tók 30 mínútur að afgreiða þessi tvö númer sem á undan mér voru. Gamli piparkallinn úr Grafarvoginum (ég) var orðinn brúnaþungur í biðinni, en þegar upp var staðið tók ég gleði mína á ný, þar sem ísinn var frábær og brosmilda starfsfólkið hjá Huppu standa sig gríðarlega vel í ísbrjálæði landans í 12 gráðu sumarblíðunni.

Aðförin að einkabílum borgarbúa heldur áfram hjá borgarstjórnarmeirihlutanum. Nú á að skattleggja umferðaröryggi með því að setja gjald á nagladekk. Ónýtt gatnakerfi er víst nagladekkjunum að kenna, en ekki engu viðhaldi og endurbótum né því handónýta tjöruleðjumalbiki sem notað er. Ólafur hjá FÍB benti á það í útvarpsviðtali í vikunni, hve mikil vitleysa þetta gjald er. Borgaryfirvöld hafna fjármagni í samgöngumál til að kúga hinn almenna borgara yfir á reiðhjólahnakkinn eða inn í strætó. Samt getur fólk sem stundar vaktavinnu ekki nýtt sér strætó um helgar þar sem þar er sofið út nánast fram á hádegi og þess má geta að miðstöð Strætó í Mjóddinni opnar ekki fyrr en í hádeginu á sunnudögum. Strætó má með sanni kalla hobbý þjónustu eftir hentugleika, bara ekki hentugleika borgarbúa. Væri ekki nær að bæta þjónustustigið, bæta við vögnum auka ferðir og hætta borgarlínu-bullinu sem mun aldrei kosta rúma 60 milljarða, kostnaðurinn á eftir að fjúka auðveldlega upp í 100 milljarða eða meira og þetta er fjármagn sem er bara ekki til.

Um 63% landsmanna telja lögregluna ekki í stakk búna til að takast á við hryðjuverkaógn á Íslandi, samkvæmt óvísindalegri könnun útvarpsþáttarins Reykjavík síðdegis á Bylgjunni. Það fer hrollur um mann yfir umræðunni á Bretlandi um niðurskurð til löggæslumála. Við höfum gengið í gegnum það sama, fækkun lögreglumanna og fjársvelti. Tilfinningin er að þessar nokkrar hræður sem sinna löggæslumálum séu á hlaupum á eftir grashausum með plöntur í bílskúrum sem eru leyfðar í mörgum vestrænum ríkjum. Er ekki kominn tími til að stokka upp, auka fjármagn og tryggja eftir bestu getu að þessi vá sem hryðjuverk eru geti ekki átt sér stað hérlendis.

Góða helgi

The post FöstudagsÁrni – Meiri hávaði af borgarlínu en herflugvél appeared first on Local Sudurnes.

Borgarbúar standa frammi fyrir skýrum valkostum í næstu borgarstjórnarkosningum. Vilja borgarbúar borgarlínu sem lögð verður á kostnað einkabílsins og að sum hverfi borgarinnar bjóði einvörðungu upp á lestarsamgöngur þar sem einkabílinn kemst ekki um? Vilja borgarbúar, eða réttara sagt sjá borgarbúar fram á það að íbúðir í Vatnsmýrinni verði á ákjósanlegu verði til að mynda fyrir þá sem eru að kaupa sína fyrstu eign? Eru borgarbúar sáttir við sölu eigna til að sýna betri rekstrarafkomu borgarinnar eða þá stefnu að stöðva lóðaúthlutanir í úthverfum í þágu uppbyggingar miðborgarinnar? Vilja allir búa í 101? Þetta eru stórar spurningar sem kjósendur þurfa að íhuga á móti öðrum valmöguleika. Að ráðist verði strax í lóðaúthlutanir í úthverfum, unnið verði að bættum samgöngum þar sem einn samgöngumáti er ekki bættur á kostnað annars samgöngumáta, tekið verði til í rekstri borgarinnar og grunnþjónusta tryggð og dregið verulega úr skuldasöfnun. Dagur B. Eggertsson, borgarstjóri hefur viljandi ekki úthlutað lóðum í úthverfum til að beita þrýstingi á uppbyggingu í Vatnsmýrinni. Þar skiptir engu um að fólk er á götunni, fólk er að flýja til nágrannabæjarfélaga, borgin er að tapa aðdráttaraflinu, almenningur er að gefast upp á stjórnleysinu. Það er hálf sorglegt til þess að vita að við borgarbúar eigum eftir eitt langt ár til viðbótar með Dag í borgarstjóraflokknum, ég segi bara Guð blessi Reykjavík.

Meira um borgarmálin, endurbætur á Hlemmi eru farnar langt umfram kostnaðaráætlun. Um er að ræða enn eitt gæluverkefni borgarstjórnar. Þar á að rísa matarmarkaður af erlendri fyrirmynd. Framkvæmdin mun án efa teygja sig nær 200 milljónum króna á sama tíma og ekki er til fjármagn í leikskóla og deildir standa mannlausar. Gæluverkefnin víða um borgina gefa gaum um að grunnþjónustan er aukaatriði. Gott dæmi um annað gæluverkefni er veggur á fjölbýlishúsi í Breiðholti þar sem skellt var upp málverki sem kostaði skattgreiðendur tæpar 70 milljónir. Á meðan mæta blessuð börnin í Breiðholtsskóla í myglað húsnæði á hverjum degi. Viljum við slíka forgangsröðun?

Ég veit ekki alveg með endurkomu Akraborgarinnar. Já í júní hefjast á ný siglingar á milli Akraness og Reykjavíkur sem lagðist af á sínum tíma er Hvalfjarðargöngin opnuðu. Ég veit ekki hvort ég eigi að fagna eða flissa. Ég veit ekki hvort við ættum líka að fá sykraða drykkinn Póló aftur í verslanir, eða á maður líka von á Don Cano krumpugöllunum aftur? Eða eigum við að mála strætó aftur græna? Sumt má bara kjurt liggja í fortíðinni að mínu mati, þá langar mig að vita hver kostar verkefnið? Er það bara Akraneskaupstaður eða tekur Reykjavíkurborg þátt líka? Ég veit ekki hvort ferðamenn hrúist í Akraborgina til að skoða byggðasafnið á Akranesi, en það kemur í ljós 11. Júni næstkomandi.

Gaman að sjá suma reyna að tala gegn Costco. Einn ónefndur ritstjóri vefmiðils talar um aukna mengun vegna fjarlægðar og svo virðist vera að vinstri menn eru meira á móti samkeppni og sanngjarnara vöruverði til almennings. Það kemur auðvitað ekkert á óvart, ég meina vinstri menn voru á móti litasjónvarpi og bjórnum á sínum tíma. Koma Costco hefur ýmis jákvæð áhrif í íslensku samfélagi, en auðvitað má alltaf finna eitthvað neikvætt. Við þurfum að passa okkur á að missa okkur ekki í kruðiríinu og kræsingunum svo heilsan dali ekki. En að öllu jöfnu snýst þetta um að barnmargar fjölskyldur geta sparað verulega Það hefur verið gaman að fylgjast með gleðinni á samfélagsmiðlum er fólk póstar verðmuninum, og er ekki í lagi að leyfa fólki að fagna komu Costco? Af hverju þurfa þeir sem ekki ætla sér að eiga viðskipti við fyrirtækið að rita greinar til að tilkynna þjóðinni það og reyna að draga úr gleðinni? Sumir vilja bara vera leiðinlegir, en geta þeir ekki bara gert það einir heima með svart/hvíta sjónvarpið og landabrúsann?

Ég get ekki annað en fagnað því að fljótlega verður úthlutað úr bókasafnssjóði. Einhverjar tafir hafa verið á úthlutuninni sem á að fara fram fyrir 1. Júní en samkvæmt upplýsingum frá menntamálaráðherra verður drifið í þessu á næstu dögum. Rithöfundar hafa beðið í örvæntingu sinni eftir styrkjum enda búið að opna Costco. Ég varla náði svefni í maí vegna málsins, en sé fram á að ég get lagt mig á meðan rithöfundarnir vaða um ganga Costco og eyða skattfénu okkar. Leiðinlegt að listamannalaun og styrkir séu eina leiðin hjá mörgum listamönnum til að eiga fyrir salti í grautinn, hvar er sjálfbærnin?

Það var allt í fokki á Alþingi í vikunni vegna skipan 15 dómara við nýjan dómstól. Jón Þór þingmaður pírata, æi þessi sem hættir reglulega, en kemur alltaf aftur, hann missti sig í ræðustól og notaði orðið fokking. Málalyktir eru í raun þær að hann tilkynnti að hann væri ekki lögfræðingur og þyrfti betri skýringar á málunum áður en þau yrðu afgreidd. Einhver þingmaður í sal brosti til hans og virtist það vera nóg til þess að þingmaðurinn sprakk og öskraði á þingheim. Forseti Alþingis bað þingmenn að vanda orðalag sitt og bað Jón því afsökunar. En þetta er orðið svo alþýðlegt á þingi, götumál unglinga er komið inn í ræður þingmanna sem líka missa stjórn á sér eins og dekraðir unglingar.

Það voru samt fleiri en Jón Þór pírati sem voru dónalegir í vikunni. Gísli Marteinn hjó í Reykjavíkurþing sjálfstæðismanna og kallaði þá 300 sjálfstæðismenn sem komu saman til að ræða málefni borgarinnar lýðskrumara. Að uppnefna fólk sem kemur saman og ræðir skandalinn í borgarmálunum með þessum hætti er hálf barnalegt af Gísla. Hann var nú hluti af þessum hópi á tímabili, stór hluti þessa fólks kaus hann í prófkjörum og stóð við bakið á honum þegar hann var borgarfulltrúi fyrir Sjálfstæðisflokkinn. Gísli óx frá flokknum og deilir lífssýn sinni með Degi B. Eggertssyni sem er bara allt í góðu, það geta ekki allir haft sömu sýnina í þessum málum, en Gísli er með öðrum orðum að segja fuck you við allt það fólk sem studdi hann, treysti honum og varði hann á hans pólitíska ferli í borginni – þau eiga ekki þessa framkomu skilið, það kemur mér á óvart að Gísli beri ekki virðingu fyrir fólki.

Góða helgi

The post FöstudagsÁrni: Það var allt í fokki á Alþingi í vikunni appeared first on Local Sudurnes.

Costco-æðið reið loksins yfir þjóðina í vikunni. Netmiðlar sýndu beint frá því er hurðin var rifin upp snemma að morgni þriðjudags þar sem íslendingar streymdu inn í búðina. Enda höfðu margir staðið klukkustundunum saman í biðröð. Opnunin fékk nær meiri athygli en sjálft þorskastríðið á sínum tíma. Enda ekki von, að ganga þarna inn er eins og að detta yfir til Bandaríkjana. Víðáttan í allar áttir, hnausfull vörubretti, Gíraffi í fullri stærð og sykurpúðar,uppblásnir bátar, BMW, pizzur, sólhúsgögn og svona má lengi telja. Flest allt á verði sem við höfum ekki séð í fákeppninni. Það ber að fagna því að nú sé kominn risi á markaðinn sem í raun sendir þeim sem hafa kúgað fé út úr þjóðinni fingurinn. Mesta grínið varðandi opnunina var viðtal við forstjóra Skeljungs sem rökstuddi svívirðilega álagingu olíufyrirtækjanna með því að þeir bjóða upp á þjónustu, bílaþvottaplön og ryksugur. Já tjörumettaðir kústarnir sem sarga sig í gegnum lakið og grútskítugir ryksugubarkar sem oftast eru stútlausir. Já skömmin er þeirra því nú hefur það góðan tilgang að skreppa í Garðabæ og tanka bílinn. Einhver benti á að fyrir meðal bíl er sparnaðurinn á bensíni yfir 50 þúsund á ári – það munar um minna.

Hræðilegir atburðir sem áttu sér stað í Bretlandi í vikunni hreyfa við vestrænum þjóðum. Fjölmiðlar moka fréttunum inn og rífa ekki bara upp sorgina heldur reiðina líka. Hryðjuverkaárásir eru skelfilegar, en allt ofbeldi er það líka. Vestrænar þjóðir hafa oftar en ekki svarað hryðjuverkum með ofbeldi. Sprengt upp konur og börn í Sýrlandi. Þá birtist kannski ein frétt um atvikið og það er öllum sama. Mikið er ég leiður yfir allri grimmdinni sem ríkir í heiminum. Þetta er ofar mínum skilningi. Að við í hinum vestræna heimi séum á sama plani og hryðjuverkamenn er ekki eðlilegt. Ég hef þó enga lausnir gegn hryðjuverkum, en ég veit bara að það er aldrei réttlætanlegt að svara ofbeldi með ofbeldi. Ég vona að getum farið að lifa í sátt og samlyndi þar sem fjölbreytileikinn fær notið sín.

En til að fjölbreytileikinn geti blómstrað þurfa allir aðilar að koma að borðinu, þar á meðal múslimar. Skítakökuna þessa vikuna fær ferðaþjónustufyrirtækið sem tók á móti ferðamönnum sem allir eru múslimar. Hópurinn stefndi á rútuferð, en þegar bílstjórinn, sem er kona, mætti á svæðið varð allt vitlaust. Múslimarnir neituðu að ferðast með kvenmannsbílstjóra. Fyrirtækið brást við með þeim hætti að skipta konunni út fyrir karlkyns bílstjóra. Þvílík vonbrigði, fyrirtækið hefði átt að sjá sóma sinn í því að standa með kvenfrelsi í landinu og almennum mannréttindum og í síðasta lagi að hafa þor til að standa með starfsfólkinu sínu. Ég er sannfærður um að þetta fyrirtæki hefði lifað af tapið við það eitt að afþakka boð um þjónustu við þennan hóp.

Aðeins meira um Costco, enda á allra vörum, nema kannski Sigrúnar. Sigrún fyrrum umhverfisráðherra og framsóknarkona er í raun eins og gamall hestavagn í miðjum umferðarþunga borgarinnar á háanna tíma. Hún ætlar aldrei í Costco af hræðslu við offrosið kjötmeti. Í Costco er mikið magn af ferskri kjötvöru og úrvalið þvílíkt að íslendingarnir stóðu agndofa. Sigrún greyið, sem er soldið eins og margir í Framsóknarflokknum, er föst í torfkofahugsjóninni og ætti að parkera hestavagninum, leggja sauðskinsskónum og vera einfaldlega með í nútíma samfélagi, elsku Sigrún þú ert ágæt kona, ég er ekki að ljúga að þér að það er gaman að vera til á tuttugustu og fyrstu öldinni – vertu með elskan.

Íslenska heilbrigðiskerfið í öðru sæti, en það danska í tuttugasta og fjórða, hvað segja jafnaðarmenn við því? Það er vægast með ólíkindum hvað við íslendingar getum talað niður jákvæða hluti í samfélaginu. Meira er að stjórnmálamenn séu þátttakendur í slíku er auðvitað með eindæmum. En sem betur fer hefur þjóðin ekki áhuga á 50% tekjuskatti í skiptum fyrir danska heilbrigðiskerfið. Það sem kemur mér mest á óvart í þessu er að það þurfi í raun heilbrigðiskerfi í Danmörku, miðað við lýsingar íslendinga sem þar búa. Dásemdin upp um alla veggi, heilsan í fyrirrúmi á reiðhjólunum, einn kaldur á kantinum eftir vinnu þetta hljómar allt svo himneskt.

Nokkuð þægilegt að starfa á vinnustað þar sem ekki er hægt að reka þig. Alþingi íslendinga er einn slíkur vinnustaður þar sem þú ert ráðinn í fjögur ár í senn og getur í raun gert hvað sem er á tímabilinu. Sigmundur Davíð hefur ekkert verið að stressa sig á því að mæta til vinnu eins og tíðnefnt er orðið. Nú segir kappinn að umræðan þar sé ekki frjó og vitræn. Þess vegna er hann knúinn til að stofna hugarveituna framfarafélagið. Hann þrætir fyrir að þetta sé stjórnmálaflokkur, en það kæmi ekki á óvart að þetta sé upphafið að klofningi Framsóknarflokksins. Hvort það sé offrosið kjötmeti í Costco sem greinir þá á eða glæsileg forsætisráðherratíð Sigmundur verður að koma í ljós síðar þegar Sigmundur og félagar koma út úr skápnum með tilgang þessa félags.

Góða helgi

The post FöstudagsÁrni – Aðeins meira um Costco og Sigmund Davíð appeared first on Local Sudurnes.

Borgarstjórn situr ekki auðum höndum og splæsir þetta sumarið í hjólreiðastíga fyrir litlar 525 milljónir króna. Margir eru á því að þarna sé fjármagni okkar borgarbúa vel varið. Ég fagna umhverfisvænni samgöngumáta sem hjólreiðar eru svo sannarlega og tala nú ekki um jákvæð heilsufarsleg áhrif. Auðvitað þarf að leggja hjólreiðastíga í áföngum og huga vel að framtíðar skipulagi og gera það án þess að skerða aðra samgöngumáta. Ég verð að viðurkenna að þessi hálfi milljarður hefði mátt fara í að koma í veg fyrir músagang í mötuneytum barna í grunnskólum borgarinnar, berjast gegn myglu í Breiðholtsskóla og jafnvel virkja þær deildir sem eru lokaðar á leikskólum borgarinnar í sparnaðarskyni. Allir hafa skoðun á forgangsröðunni og mín er sú að grunnþjónusta borgarinnar eigi að vera ofar í goggunarröðuninni en hjólreiðar.

Talandi um grunnþjónustu þá hefur Dagur B. Eggertsson, borgarstjóri hafið kosningabaráttuna. Hann boðar lækkun leikskólagjalda. Lækkunin mun skila foreldrum 3,000 kr í sparnað á mánuði. Auðvitað munar um slíka upphæð á ársgrundvelli. Miðað við bætta afkomu borgarsjóðs hefði verið ráð að bæta í málaflokkinn og sjá til þess að þau börn sem eru föst hjá dagmæðrum kæmust á leikskóla. Margar barnafjölskyldur eru í miklum vanda hvað þetta varðar á meðan deildir eru lokaðar. Að lækka leikskólagjöld er elsta trikkið í bæjarpólitíkinni, gleymum ekki loforði VG fyrir síðustu borgarstjórnarkosningar um gjaldfrjálsan leikskóla. Lækkunin er jú ein bíóferð á mánuði, en spurningin er hvort vilja foreldrar öflugri leikskóla eða eina bíóferð?

Mikið er ég glaður yfir átakinu gegn plastpokanotkun. Er það eðlilegt að við íslendingar notum 35 milljónir plastpoka á ári. Hver poki getur verið allt að 500 ár að leysast upp í náttúrunni og talið er að árið 2050 verði meira plast en fiskar í hafinu. Það er miður að tillaga sjálfstæðismanna í borginni um plastpokalausa borg fékk ekki byr undir báða vængi hjá meirihlutanum. Við verðum að stimpla okkur inn í umhverfismeðvitundina, ég veit að það er erfitt, en ég er að reyna að bæta mig hvað þetta varðar og hvet alla til að gera það líka.

Æi þið verðið að afsaka, en ég hreinlega nennti ekki að horfa á youtube myndbandið hans Óla sparigrís um Búnaðarbankamálið. Að hann sé að ávarpa þjóðina beint frá heimili sínu í Sviss þar sem kostar skildinginn að lifa, í von um hvítþvott mannorðsins. Ég er hreinlega í of miklu sumarstuði til að detta í meðvirknina með honum, en er sannfærður um að upp poppi einstaklingar sem verja hann og finna til samkenndar – ég verð ekki í því liði.

Dramatíkin er allsráðandi í Verzló – feministafélag innan skólans hefur tekið völdin. Gilz var bókaður af nemendafélaginu til að skemmta prófþreyttum unglingum. Nema hvað að feministarnir innan skólans tóku málið í sínar hendur og var Gilz afbókaður. Það er greinilegt að Gilz hjakkast í gegnum lífið með fortíðardrauga á bakinu. Ég er að vísu þannig að ef ekki næst að sanna fyrir dómi sekt manna þá eru þeir saklausir. Þá fékk Ingó veðurguð sömu útreið há Verzló fyrir skoðanir sínar á átakinu free the nipple. Ég hefði frekar haldið að Ingó væri hafnað fyrir það eitt að hafa ekki bætt nýju lagi á lagalistann síðustu árin. Það er einkennilegt að hann skuli ekki styðja átakið, eg geri það í huganum en afþakka algjörlega útsýnið sem heillar mig lítið.

Góða helgi, hlakka til að sjá ykkur öll í biðröðinni við opnun Costco í næstu viku.

The post FöstudagsÁrni: Grunnþjónusta á að vera ofar í goggunarröðuninni en hjólreiðar appeared first on Local Sudurnes.

Annar snilldardíll Kadeco snýr að sölu á leigufélagi í eigu Kadeco þegar leigufélaginu Heimavöllum var selt leigufélagið Ásabyggð. Kaupverðið var ekki gefið upp, en athygli vakti að leigufélagið Heimavellir hækkaði leiguverðið til viðskiptavina Ásabyggðar áður en blekið var þornað á samningnum og áður en króna hafði fengist upp í söluverðið. Eftir kaupin varð til stærsta leigufélag landsins.

Gætu hagnast um milljarða á hálfu ári

Forsaga fyrra málsins er sú að í desember síðastliðnum gekk Þróunarfélag Keflavíkurflugvallar, Kadeco, frá samningum á sölu á um 90.000 fermetrum af íbúðar- og iðnaðarhúsnæði við fasteignaþróunarfélagið Íslenskar fasteignir hf. að undangengnum löngum viðræðum. Söluverð húsnæðisins var 5 milljarðar króna, eða um 55.000 krónur á fermeterinn. Og svona til að setja það í samhengi þá er það á pari við fermetraverð á íbúð í fjölbýlishúsi í Síberíu skv. fasteignaleit Google, kannski örlítið hærra. Rétt er að taka fram að húsnæðið var í misjafnlega góðu eða slæmu ástandi, eftir því hvernig á það er litið, og áætlaði kaupandinn að leggja um 2 og hálfan milljarð króna í endurbætur – þar með yrði fermetraverðið orðið um 83.000 krónur.

Samningarnir voru, eins og áður segir, undirritaðir í desember síðastliðnum, en þá hefði flestum átt að vera ljóst að fasteignaverð var á hraðri uppleið, enda gríðarleg uppbygging á Suðurnesjasvæðinu og þá sérstaklega ferðamannaiðnaðinum. Stjórnendum þróunarfélagsins Kadeco virðist hins vegar hafa yfirsést þessi þróun og selt íbúðir og iðnaðarhúsnæði á frekar lágum verðum til fárra aðila (38 aðilar keyptu nær allar eignir Kadeco – Um 320.000 fermetra og var söluverðið um 17 milljarðar króna, eða 53.000 kr. per ferm.)

Það er gaman að leika sér að tölum og þar sem eigendur Íslenskra fasteigna hf. hafa verið afar snjallir í viðskiptum í gegnum tíðina skulum við setja dæmið þannig upp að þeir komi hverjum einasta fermetra í verð, sem gerir dæmið ekkert svakalega flókið – Segjum að fyrirtækið selji eignir á frekar lágu fermetraverði íbúðar í sæmilegu standi á Suðurnesjasvæðinu (190.000 kr. ferm. skv. nýlegum fasteignaauglýsingum) – Þá gæti fyrirtækið hagnast um tæplega 10 milljarða króna, eða svipað og íslenska ríkið hefur hagnast á viðskiptum með sína 320.000 fermetra á þeim 10 árum sem liðin eru síðan herinn yfirgaf landið.

Hækkuðu og stækkuðu

Síðara dæmið snýst um samning við leigufélagið Heimavelli, sem er í dag stærsta leigufélag landsins með 1.714 íbúðir á sínum vegum, fyrirtækið hefur vaxið gríðarlega eftir kaupin á leigufélaginu Ásabyggð, en fyrir var félagið með 445 íbúðir á sinni könnu. Fyrirtækið fékk 716 íbúðir í hendurnar við kaupin á Ásabyggð og leigutekjur fyrirtækisins margfölduðust á síðasta ári, fóru úr 512 milljónum króna árið 2015 í 1.495 milljónir króna árið 2016.

Þá vakti athygli að fyrirtækið hækkaði leiguverð til viðskiptavina sinna á Ásbrú, nánast daginn eftir að skrifað var undir samninga við Kadeco um kaupin á Ásabyggð, í sumum tilfellum um tugi þúsunda á mánuði.

Því er oft haldið fram að hlutverk fjölmiðla eigi meðal annars að vera það að sýna yfirvöldum aðhald – Suðurnes.net hefur margoft fjallað um viðskipti tengd Kadeco á gagnrýnan hátt undanfarin misseri, einn fárra fjölmiðla, og þá einkum gagnrýnt á hversu fáar hendur umræddar eignir hafa farið, afar lágt fermetraverð og háar launagreiðslur og þóknanir til stjórnenda og stjórnarmanna fyrirtækisins.

The post Frá ritstjóra: Fasteignafélög moka inn seðlum eftir snilldardíla við Kadeco appeared first on Local Sudurnes.

Eyrun á mér dofna í hvert skipti sem ég heyri minnihlutan á Alþingi byrja rausið um einkarekstur hér eða þar og að þetta rekstrarform sé verkfæri djöfulsins. Nú fór nær öll vikan og hluti þeirrar síðustu í röfl um sameiningu FÁ og Tækniskólans. Tækniskólinn varð í raun að þeirri öflugu einingu sem hann er í dag vegna sameiningu skóla. Rekstarformið er skýrt, það er ekki greiddur út arður, sé til rekstarafgangur. Heldur fer það fjármagn í uppbyggingu innviði skólans. Þegar þetta form var valið á sínum tíma var það tímabundið, til að sjá hvort og hvernig það virkaði. Það kom glimrandi vel út og var samþykkt af vinstri stjórn að binda það í sessi. En núna er allt annað upp á teningnum, þetta er grábölvað verkefni hægri aflanna í landinu. Sama má segja um græðgi lækna í einkarekstri, en samt rétti vinstri stjórnin tannlæknum þvílíkar upphæðir með niðurgreiðslu tannlæknaþjónustu barna. Það væri ljúft og skylt ef þessir flokkar gætu einu sinni verið samkvæmir sjálfum sér. Tökum VG sem dæmi sem fordæmir stóriðju en samþykktu slíkt voðaverk í stjórnartíð sinni. Hverju eigum við að trúa og treysta í fari þessa flokka? Jú það er bara eitt sem hægt er að treysta á hjá þeim, þú færð minna í launaumslaginu þegar þeir sitja við ríkisstjórnarborðið.

Ungur maður lenti í því leiðilega atviki að bílinn bilaði í umferðaþunga og var vandi að koma bílnum upp á næstu umferðaeyju. Faðir hans var mættur til að hjálpa og fyrr en varir stóð sjálfur forsætisráðherrann og hjálpaði við að ýta bílnum. Bjarna munaði lítið fyrir að hoppa út og hjálpa samborgara sínum í neyð, vel gert Bjarni. EN hvers vegna birti visir.is fyrirsögnina „Bjarni Ben kom vesalingi til hjálpar.“ Til að gera lítið úr fólki sem lendir í því óláni að bíllinn gefur upp öndina? Eða að hæða Bjarna? Þetta eru einkennileg skrif og mín tilfinning er að viðkomandi blaðamaður gat ekki hugsað sér að skrifa jákvæða frétt um Bjarna Ben og varð að hæðast til að draga úr vægi fréttarinnar.

Stuðboltin Ragnheiður Elín Árnadóttir, fyrrum ráðherra er komin með nýja diskókúlu. Gekkst hún undir mjaðmakúluskipti á sjúkrahúsi í Svíþjóð í vikunni. Þetta er gott dæmi um vitleysuna í íslensku samfélagi. Rógur gegn einkareknum stofum sem vinna gegn ríkisspítölunum á sama tíma og sjúklingar geta krafist þess að gangast undir aðgerðir erlendis, ef biðlistinn sé langur. Ragnheiður lagðist undir hnífinn á einkareknu sjúkrahúsi í Svíþjóð, já auðvitað viljum við að skattarnir okkar renni í vasa svía en að íslenskir sjálfstæðir læknar fái að njóta þeirra. Læknarnir gætu velt þessu fé út hagkerfið, greitt virðisauka af vöru og þjónustu hérlendis sem skilar sér aftur í ríkissjóð. Hver vill eiginlega slíka vitleysu, auðvitað eigum við að styrkja frekar önnur hagkerfi í fjarlægum löndum og stuðla að flæði fjármagns úr landi. En talandi um ríkisrekna heilbrigðisþjónustu, ég ræddi í vikunni við konu sem pantaði tíma hjá lækni og þegar hún loksins komst að vildi hún láta mæla blóðþrýstinginn. Læknirnn hafnaði þessari vitleysu og bað hana að panta annan tíma fyrir hádegi. Hann mælir ekki blóðþrýsting eftir hádegi. Við sjáum öll að það er ekki hægt að ætlast til þess að vera mældur hvenær sem er dagsins, er það nokkuð?

Ég verð að viðurkenna að leðraðir karlmenn á mótorhjólum eru sannir boðberar sumarsins hjá mér. Þeir eru rétt eins og sjálf lóan, nema það vantar bara undurfagran söng lóunnar í stað vélarhljóðsins ógurlega. En ég gef þeim gaum í umferðinni og nú í vikunni er ég að ganga þvert yfir bílastæði fyrir utan stórmarkað. Þá kemur einn rúllandi á svakalegu hjóli með mjög háu stýri. Ég hugsaði með mér að blóðflæði til handanna getur ekki verið mikið í þessu tilviki. Hjólið rúllar fram hjá mér og ég sný mér við og rek upp stór augu. Jakkinn og buxurnar voru tveimur númerum of litlar svo að við blasti þessi líka svakalegi plömmer. Ég hef bara eitt að segja við þennan mann og það er að vaxa skoruna ef þú ætlar þér að vera boðberi kynþokkans á strætum borgarinnar þetta sumarið. Verst að Bjarni Ben var ekki á svæðinu til að skutla yfir hann teppi til að koma vesalingnum til hjálpar.

Ef hinn almenni borgari væri með 12,8% mætingu til vinnu væri að sjálfsögðu búið að reka viðkomandi. Áhugaverð frétt um mætingar Sigmundar Davíðs í atkvæðagreiðslur á Alþingi, var birt í vikunni. Það eru 140 dagar síðan Sigmundur gaf sér tíma til að mæta í þingsal og greiða atkvæði. Við kjósum okkur fulltrúa á þing og hljótum að krefjast þess að fólki sinni störfum sínum. Þá kom líka fram í fréttinni að Sigmundur hefur mætt á 4 fundi af 13 í utanríkisnefnd. Þessi 4 skipti sem hann mætti kom hann alltaf seint, minnst 20 mínútum of seint, mest einni klukkustund og fjörutíu mínútum. Þetta hljómar eins og lélegt stand up, hvað er maðurinn að gera á þingi? Það er þrennt í stöðunni, Sigmundur er á kafi í undirbúningi fyrir framboð sitt í borginni, eða á kafi í undirbúningi að stofnun nýs stjórnmálaflokks, eða hreinlega er hann hrokafullur og að það sé fyrir neðan hans virðingu að mæta.

Góða helgi

The post FöstudagsÁrni: “Leðraðir karlmenn á mótorhjólum sannir boðberar sumarsins” appeared first on Local Sudurnes.

Verð að minnast á fréttir þess efnis að fátækt er að aukast verulega í Danmörku. Hvernig getur það staðist? Í draumalandi jafnaðar- sósíalskra manna. Við höfum Samfylkingu og fleiri flokka sem berjast fyrir sömu stefnu og þar ríkir. Þar eru allir jafnir, þar er gott að lifa á kerfinu, allt frítt, háir skattar, öllum refsað skattalega séð sem skara framúr í nafni jöfnuðar. Hvernig getur þá fátækt farið vaxandi í dramalandinu góða? Er jafnaðarstefnan brotlent? Getum við lært af ástandinu þar og séð hvað gengur upp og hvað ekki? Á meðan lífsgæði dala, miðað við þessa niðurstöðu, er verið að stofna enn einn vinstri flokkinn á Íslandi sem glögglega er tímaskekkja, en dreifir ennfrekar atkvæðum á vinstri vængnum og því ber að fagna.

Ein önnur rannsóknin birtist í íslenskum fjölmiðlum í vikunni um skaðsemi sykurlausra gosdrykkja. Ég er háður Coke Light og var með slíka flösku við höndina í veislu um helgina. Kona ein sá það sem skyldu sína að lesa yfir mér um óhollustuna og áhættuna sem ég iðka með drykkju minni. Elliglöp, heilablæðingar og fleira og ég var orðinn bugaður á lífið og tilveruna að hlusta á fyrirlestur ókunnugu konunnar. Loksins er ræðuhöldin tóku enda, reif hún upp úr veskinu sígarettur og fór út í smók. Þetta svipar til að fá ráðgjöf um holla fæðu frá spikfeitum næringafræðingi.

Frá og með næstu áramótum er bannað að deyja í Reykjavík. Fólk í slíkum hugleiðingum er vinsamlegast beðið um að gera það í öðrum landshlutum. Ef það vill láta brenna sig, endilega skipuleggið ykkur vel og setjið ykkur í samband við ættingja með arinn eða eigendur ljósabekkja. Já líkhúsið í Fossvogi á orðið heima á Árbæjarsafni og buddan hjá Kirkjugörðum Reykjavíkur er galtóm. Einnig er bent á að hægt er að leigja kerrur til að flytja hina látnu á urðunarstaði Sorpu. Já fasteignaverð er í hæstu hæðum, blússandi kaupmáttur, bónusarnir flæða til stjórnenda bankanna, lífið og tilveran er frábær í íslensku samfélagi. En það er ekki til staðar fjármagn til að veita okkur örlitla reisn við hinstu för okkar.

Það er vandlifað í henni veröld. Verslanir í Hörpu eru sakaðar um ódýrt túristadrasl og skort á fagurfræði. Íslensk og erlend hönnun, lopapeysur og blómvendir eru yfir meðlimi Sifónuhljómsveitarinnar hafin. Þau geta víst ekki látið bjóða sér svona ófögnuð, ef marka má fréttir þess efnis. Á sama tíma standa samfélasmiðlar og commentakerfi á öndinni yfir fyrrum fegurðardrottningu sem fór offari í fagurfræðinni. Tinna Alavis birti myndir úr afmæli dóttur sinnar og netverjar gubbuðu yfir þessa smekklegu mömmu sem lagði sig alla fram við að gera daginn eftirminnilegan fyrir barnið sitt. Frozen kökur, blöðrur og sérmerktar servéttur er ekki boðlegt í barnaafmæli ef marka mað nýðingshátt netverja í garð Tinnu. Ég verð fyrir mitt leyti að segja að það er markt hægt að læra af Tinnu, það er margur maðurinn sem býr við skort á fagurfræði, en auðvitað gerir hver með sínu nefi. Ég skil ekki æsinginn, algengt er að fara með barnaafmælin í lazertag, bíó, á pizzastaði og framvegis, allt kostar þetta. Það er alið á öfund í samfélaginu og að fólk sjái þörf sína að röfla yfir fallegu barnaafmæli, þá er tímabært að setjast niður og hugsa sinn gang. Sumir eru bara að kafna úr eigin óhamingju og leiðindum. Tinna mín, ég væri til í að fá þig til að stílsetja næsta stórafmæli hjá mér, þú ert snillingur.

Á meðan ástandið á Kóreuskaga mælist nánast á jarðskjálfamælum og andrúmsloftið rafmagnað, sitja íslenskir þingmenn og rífast yfir rafrettum. Þvílík lúxus vandamál sem stjórnmálamennirnir okkar búa við. Starfsbræður þeirra sofa ekki úr stressi yfir kjarnorkuvá, en nei þá kafna okkar þingmenn í frekjuköstunum yfir rafrettum. Og ef við lítum til Kanada þá er forsætisráðherrann þar að ræða lögleiðingu kannabis og bendir á fáranleikann að í kanadískum fangelsum sitja inni einstaklingar sem hafa fengið sér jónu.Hve margir af okkar þingmönnum hafi fengið sér í haus á einhverjum tímapunkti í lífinu? Nú er verið að tengja rafretturnar við kannabisolíu og það er eins og himinn og jörð séu að farast. Hvar er frjálslyndið í íslensku samfélagi? Hvar er frjálslyndið í mínum stjórnmálaflokki? Frumvarp sem felur í sér taumhald ríkisins á eigum eldra fólks með það að leiðarljósi að börn þeirra geti keyft fasteign. Boð og bönn á rafrettur sem hjálpa fólki að hætta að reykja og lifa heilbrigðara lífi. Skattahækkanir,jafnlaunavottun og rúsínan í pylsuendanum í umræðunni á þinginu er vottun hótela um að þau leyfi ekki vændi á hótelherbergjum. Er þetta innskot fyrir komandi áramótaskaup? Verða viðkomandi hótel með siðgæðisvörð í hverju herbergi eða verður skellt skirlífsbelti á gesti við innritun? Forsjáhyggjan er allsráðandi á Alþingi um þessar mundir. Ég hvet félaga mína í Sjálfstæðisflokknum til að setjast niður um helgina og lesa stefnu flokksins og fara að vinna eftir henni. Eini maðurinn sem starfar eftir stefnu flokksins er Guðlaugur Þór Þórðarson utanríkisráðherra. Hann er á fullu í viðskiptatengslum tl að auka útflutning og afla gjaldeyristekna fyrir þjóðarbúið.

Góða helgi

The post FöstudagsÁrni – Hvernig getur fátækt farið vaxandi í dramalandinu góða? appeared first on Local Sudurnes.

Mikael Torfason hefur fjallað um fátækt á Íslandi upp á síðkastið. Sjálfsögðu þarf að ræða stöðuna í íslensku samfélagi og vinna að því að draga úr fátækt eins og hægt er. Fátækt hefur dregist saman á heimsvísu, það er bara ekkert fjör að fjalla um það í fjölmiðlum. Hungursneið hefur dregist saman um 20% síðan 1970. Við erum að gera eitthvað rétt, tölurnar tala sínu máli. Ég fagna því að Mikael veki umtal um málefnið enda má alltaf gera betur. EN hann er oft hvatvís hann Mikael og getur á sama tíma og hann er að gera vel, skaðað. Hann hjólaði í forsætisráðherrafrúnna á dögunum með ljótum hætti. Þóra er einn af þáttarstjórnendum í þættinum falleg íslensk heimili sem sýndir eru á Stöð 2. Þóra Margrét sem er hönnunarráðgjafi, hefur ekkert vit á menningu eða listum af því að hún er efnuð, að mati Mikaels. Hann gagnrýnir harðlega heimsókn á heimili manns sem tengist panama æðinu fræga. Það er nokkuð ljóst að staðhæfingar Mikaels um að efnameira fólk hafi ekki vit á menningu og listum er auðvitað fjarstæðukennt. Auk þess eru litlar líkur á því að heimilin sem eru heimsótt séu ákveðin að öllu leyti af þáttarstjórnendum. Mikael sem nú hefur gengið til liðs við Sósíalistaflokkinn hefur skotið sjálfan sig í fótinn og það er ekki í fyrsta skiptið og ekki það síðasta.

Benedikt fyrrum páfi er snillingur. Hann fagnaði níutíu ára afmæli sínum með einum svellköldum og freiðandi bjór. Með honum í dagdrykkjunni var eldri bróðir hans og níutíu og þriggja ára Georg vinur hans. Þetta kalla ég stuðpinna af Guðs náð. Benedikt er fyrsti páfinn í 600 ár sem segir af sér embætti, en venjan er að þeir geispi golunni í embætti. Hann nennti þessu ekki lengur, hætti þessu bulli fyrir fjórum árum og datt í það. Ég vona að mér beri sú gæfa til að skvetta aðeins í mig bjór þegar og ef ég næ níræðu.

Það er með ólíkindum hvað það kemur alltaf jafnt á óvart að lömb komi í heiminn þegar líða fer að vori. Magnús Hlynur fréttamaður þeysist um Suðurlandið úr einu fjósi í annað til að landsmenn missi nú ekki af þessu stórkostlega kraftaverki náttúrunnar. Þá eru fréttirnar sýndar á besta tíma í fréttum og miðað við spenninginn í Magnúsi mætti líkja honum við þátttakendur í Amazing Race. Ég bíð bara eftir að Magnús hlaupi upp geitungabúin líka og fylgist grannt með rabbabara vakna til lífsins. Það má með sanni segja að hann sé í bullandi samkeppni við Landann á RÚV sem kostar sjónvarpsfólk þvert og endilagt landið í leit að ljósastaurum og mávastelli.

Sá fyrir skemmstu frétt þess efnis að WOW air er stundvísasta flugfélagið. Er ekki viss um að flugfarþegarnir á Miami séu því sammála eftir hrakningar vikunnar. Að húka í nokkra daga seinkun er ekki góð skemmtun. Sá status á facebook þar sem einn var í flýti á leið til Boston í von um að Icelandair gæti troðið sér með til að missa ekki af fermingu síns eigin barns á sumardaginn fyrsta. WOW air skyldi bara ekki í pirringnum yfir þessu og taldi farþegana vera heppna að fá nokkra aukadaga í sólinni. Ég heyri reglulega hrylllingssögur frá farþegum félagsins sem er þekkt fyrir að týna farangri, skilja farþega eftir eða hreinlega lengja dvöl þeirra óvænt eins og raun ber vitni í Miami.

The post FöstudagsÁrni: Níræður fyrrum páfi er stuðbolti af Guðs náð appeared first on Local Sudurnes.

Það er yndislegt að búa í borg þar sem takmarkað aðgengi er að húsnæði. Undir öruggri leiðtogahæfni borgarstjórans styrkjum við fjölskylduböndin, já unga fólkið er lengur í foreldrahúsum og til að þrýsta hópnum ennfrekar saman hafa hækkanir á leigu til eldri borgara skilað þeim frábæra árangri að eldri borgarar flytja inn á börn sín. Munið hvað þetta var huggulegt í gamla daga, hafa ömmu og afa inn á heimilinu, stórfjölskyldan saman komin undir sama þakið í sátt og samlyndi líkt og í kvikmyndinni Djöflaeyjan. Þeir fáu sem ná sér í húsnæði gera það í gegnum félög sem reistu ekki fasteignir í gróðraskyni samkvæmt borgarstjóra. Hver dregur það í efa þótt Búseti á norðurlandi hafi skilað 181 milljón í hagnað á árinu 2015. Hugsjónin er falleg, það skiptir sköpum. Þessir fáu útvöldu sem brjóta mynstrið og veikja stefnu borgarstjóra um sameinaðar fjölskyldur þurfa til að mynda að greiða 6,5 milljónir við afhendingu 3ja herbergja íbúðar hjá Búseta og greiða ekki nema 272 þúsund í leigu á mánuði. Þetta geta sem betur fer fáir, jafnaðar- fjölskyldustefnan blómstrar í okkar yndislegu borg. Ég fór á hárgreiðslustofu í vikunni og sá sem réðist með skærin að vopni á lubbann er 42 ára. Hann missti leiguíbúðina í 101 og hefur engan veginn ráð á því að leigja. Hann er fluttur inn á foreldra sinna. Sjáið fegurðina í stöðunni. Við þurfum ekki einu sinni að hringja einu sinni í viku í mömmu og pabba, við köllum bara úr stofusófanum til að fá upplýsingar um kvöldmatinn. Förum svo út með ruslið og horfum svo öll saman á sjónvarpið. Ég er handviss um að þegar öll nýju hverfin sem borgarstjóri lofaði fyrir síðustu kosningar og lofar aftur núna, þá langar engum að flytja úr foreldrahúsum. Öreigarnir í borginni hafa verið sameinaðir undir bleiku skýi jafnaðarstefnunnar.

Tek ofan fyrir Ikea, þar er ekki legið yfir hugsjónum og gefnum loforðum, þar er framkvæmt. Fyrirtækið hefur ráðist í byggingu fjölbýlishúss þar sem starfsfólki gefst kostur að leigja íbúðir. Það er ekki nóg að Ikea flúði Reykjavík rétt eins og Íslandsbanki, hluti rekstrar Icelandair og senn Wow air, þá er Ikea að ná íbúum líka yfir í Garðabæinn. En hey látum ekki svona Reykjavíkurborg er með þetta allt saman á framtíðarplaninu, þetta kemur eins og maðurinn sagði. Ikea hefur kynnt lausnir í húsnæðismálum, hús frá fyrirtækinu sem eru ódýrari og gætu leyst hluta vandans. Enginn hlustaði og hvað þá framkvæmdi eða ýtti undir að þarna væri kostur sem mætti skoða. Við þurfum að þrasa minna og gera meira, það er nokkuð ljóst.

Bessastaðabóndinn okkar, Guðni Th. var rassskelltur í sjónvarpsviðtali í Rússlandi á dögunum. Ég er hræddur um að forseti vor hafi verið hálf aumur eftir útreiðina. Ég er ósáttur við hátterni fréttakonunnar sem fór offari í þessu viðtali. Ég tel mig hafa einkarétt á því að gera góðlátlegt grín af forsetanum okkar og aðeins hníta í hann í léttum tóni, en tek upp hanskann fyrir hann þegar aðrir gera það. Fréttakonan lét eins og forseti Íslands væri álíka valdamikill og forseti Bandaríkjana. Guðni lítur fyrst og fremst á sig sem sameiningartákn þjóðarinnar. Svo er hægt að velta því upp hvort við séum of hliðholl Bandaríkjunum, erum við að taka afstöðu sem er of einhæf í utanríkismálum? Það er viss skoðun út af fyrir sig. Guðni kom því miður hræðilega út úr viðtalinu og ég gat ekki annað en hugsað til forvera hans, Ólafs Ragnars og hvernig hann hefði snúið rassskellinum yfir á fréttakonuna.

Mikið var ég spenntur þegar ég sá frétt þess efnis að franskir vísindamenn leita að karlmönnum til að kúra upp í rúmi í 2 mánuði og fá fyrir það greitt 2 milljónir króna. Mér leið eins og ég væri að detta í lukkupottinn og opnaði fréttina. Þá er þetta rannsókn á vegum geimvísinda til að kanna hvernig þyngdarleysi geimfara hefur áhrif á líkama þeirra. En það kemur ekkert fram um að þessir 24 karlmenn fái að kúra með hvort öðrum, las á milli línanna að hver og einn væri í sér rúmi. Ég snarlega hætti við að sækja um, enda eyðilögðu þeir algjörlega stemminguna með kröfu um einhverja þyngdarstuðla. Svo halda sumir því fram að það séu forréttindi að vera miðaldra, hvítur, mjúkur hommi.

Alveg ótrúlegt atvik sem ég lenti í núna í vikunni. Fór seint að kvöldi með pappír í endurvinnslutunnurnar í ruslageymslunni. Haldið þið að þar hafi ekki verið maður liggjandi út í horni í myrkrinu. Þarna var á ferðinni þingmaður ónefnds stjórnmálaflokks. Hann flakkar víst á milli geymsla í borginni í leit að húsaskjóli. Hann var víst með niðurgreidda íbúð meðal stúdenta en það þótti víst ekki við hæfi. Samflokksmaður hans greindi fyrir skemmstu frá því að laun þingmanna eru það bágborin að ekki er hægt að nýta þau til að fjárfesta í eigin húsnæði. Ég hvet borgarbúa að henda ekki matarleifum, heldur setjum á disk og köstum kannski einu vatnsglasi með í ruslageymslurnar, þessi grey þurfa næringu, það lifir enginn á þingfararkaupi það er nokkuð ljóst.

Góða helgi

The post FöstudagsÁrni – Öreigar sameinaðir undir bleiku skýi jafnaðarstefnu appeared first on Local Sudurnes.

Það má með sanni segja að við íslendingar getum verið þverir og lítið fyrir að hugsa stundum út fyrir rammann. Á dögunum var gerð könnun hvort ganga ætti til samninga við Klínikið um framkvæmd aðgerða með það að markmiði að vinna á biðlistunum löngu. Þjóðin skiptist í helming í afstöðu sinni. Að 50% þjóðarinnar vilji að sársjúkir kveljist svo mánuðum skiptir bara til að ekki sé leitað til einkastofu er mjög sérstakt. Það sem er meira sérstakt í þessu er að ef þú ert á löngum biðlista getur þú farið fram á það að íslenska ríkið kosti þig út fyrir landsteinana til aðgerðar. Þá er þetta svo skemmtilegt að íslenska ríkið getur keypt fyrir þig aðgerð í Svíþjóð, oftar en ekki á einkastofum þannig að sænskir einkaaðilar fá kostnaðinn í vasann sem er auðvitað miklu betra en að íslenskur einkaaðili í heilbrigðisþjónustu fái aurinn í sinn vasa. Sjáið hvað þetta er brenglað? Til að toppa ástandið þá getur sænski aðilinn verið upptekinn og selt Klínikinni á Íslandi aðgerðina. Hvað gerist þá? Jú Íslenska ríkið hefur greitt svía til að framkvæma aðgerðina, sem greiðir íslendingi til að gera aðgerðina, en þá sleppur íslenska ríkið við kostnaðinn af hóteli og uppihaldi. Bíddu við, væri þá ekki skásta í stöðunni að gera samning og framkvæma aðgerðirnar hérlendis og halda fjármagni ríkisins í íslensku efnahagskerfi? Jú að sjálfsögðu. En nei við viljum það ekki, mokum í okkur verkjalyfjum vælum yfir heilsuleysinu og hvað heilbrigðiskerfið sé slæmt, neitum að einkaaðili eigi fyrir saltinu í grautinn og strunsum svo til tannlækna og augnlækna á meðan og blótum einkarekstri í heilbrigðiskerfinu.

Hreint ótrúlegt að níu mánuðum eftir landsleik er sett met í mænudeifingum. Já að sigra England í fótbolta kallaði fram greddustig sem sjaldan hefur sést áður. Spurning um að Veðurstofan skoði hvort einhver skjálftavirkni hafi verið á jarðskjálftamælum þessa umræddu nótt. Ég skil núna af hverju ég er á lausu, ég þarf að fara að mæta á landsleiki eða hanga á Ölver um helgar. Ég vissi ekki að fótbolti færi svona í klofið á manni. Nú er að fjárfesta í miða á næsta landsleik og treysta á Guð og lukkuna og hver veit, maður verður kannski genginn út fyrir jól.

Þær eru skemmtilegar umræðurnar um kaupmáttinn. Fáir sem maður ræðir við finna fyrir kaupmættinum sem mælist í himnalagi og hefur sjaldan verið eins stöðugur. Ég hef verið að benda fólki á að mælikvarðar sýna stöðuna glögglega og varla hægt að eiga við dómarann hvað þetta varðar. En ég tók upp á því í vikunni að hugsa málið. Almenningur er að endurnýja bílaflotann, þekki nokkra sem láta ekki nægja að fara eina utanlandsferð á árinu skuldir heimilanna eru á hraðri niðurleið sem segir okkur að við erum miklu minna á kreditkortafylleríi eða á yfirdrætti. Til að toppa þetta sá ég myndband þar sem sjálf diskó dívan Páll Óskar var fenginn til að opna umslag sem innihélt upplýsingar um hvort kynið væri í óléttuhófi og fólk er farið að borga skemmtikröftum til að skemmta í skírnarveislum – ef þetta er ekki óbragðið af 2007 þá veit ég ekki hvað. Og hverjum ætlum við um að kenna í næstu niðursveiflu hagkerfisins? Ríkisstjórninni? Við erum bara án efa miklir meistarar þegar kemur að neysludjammi með fjármagnið okkar og það er allt á eigin ábyrgð.

Donald Trump forseti Bandaríkjana fékk mig til að flissa í vikunni á sama tíma og ég varð hálf kvíðinn. Hann felldi úr gildi lög varðandi kolaframleiðslu og kolum sem orkugjafa. Það er auðvitað algjör afturför í umhverfismálum og kjánalegt. Ímyndum okkur að Bessastaðabóndinn stigi fram og vildi burt með ljósaperur og inn með olíulampana. En það sem fékk mig til að flissa er hvernig dettur honum í hug að framsýn nútímafyrirtæki í Bandaríkjunum vilji nýta kol sem orkugjafa? Þarf Trumpinn ekki að tóna sig niður, rífa fram dagatalið og átta sig á að hann er vofa liðinna tíma, iðnbyltingin er liðin.

Dramatíkin hefur verið ráðandi í vikunni. Útgerðir hóta flótta með fiskvinnslu úr landi vegna styrkrar stöðu krónunnar. Það má með sanni segja að málið sé snúið, það er ekki eins og útgerðirnar framleiði lyf eða skópör. Þær eru að vinna og græða á auðlind þjóðarinnar, þar er stór munur á. Þrátt fyrir að um einkafyrirtæki sé að ræða þá var fiskstjórnunarkerfið sett á á sínum tíma til að leita hagræðingar í greininni, með hag lands og þjóðar að leiðarljósi. Það má í raun líkja þessu við að Landsvirkjun myndi selja allt rafmagn til Evrópu í gegnum sæstreng og við sætum eftir í myrkrinu, bara af því að verðið er hærra í Evrópu. Hvort sem að útgerðum líkar það betur eða ei, þá hafa þeir skyldu gagnvart íslenskri þjóð, þetta er okkar fiskur.

Hitt dramatíska málið er fléttan hans Ólafs varðandi söluna á Búnaðarbankanum. Það er sorglegt að sjá hvernig stjórnvöld og almenningur var hafður að fíflum í þessu máli. Það versta við þetta mál er að kona Ólafs vakti athygli á því á dögunum að Ólafur væri dæmur glæpamaður þrátt fyrir sakleysi sitt. Hún vildi fund með forseta Íslands sem hafnaði beiðni hennar. Ætli frúin sé ennþá haldin óraunhæfri meðvirkni og haldi ennþá að hún sé gift dýrlingi? Hvað um það ,við verðum að læra af þessu máli og vanda til verka við sölu bankana. Það liggur fyrir að þeir einu sem eiga fé til að fjárfesta í bönkunum eru þeir sem áður áttu þá. Þeir eiga ennþá álnir á fjarlægum slóðum.

Ekki nóg með það að Ólafur sparigrís, er með eigur sínar í erlendum sjóðum og liggur á því eins og ormur á gulli, heldur ætlar borgin að bæta við fjármagni sem fer án efa beint úr landi líka. Almenningur tók á sig höggið fyrir íslenska fjármálakerfið og munu skattgreiðendur greiða þessum manni enn meira. Borgarfulltrúar eiga að rifta samningi um uppbyggingu íbúða við félag Ólafs. Ég ræddi við borgarfulltrúa sem tjáði mér að borgarfulltrúar í minnihluta borgarstjórnar var ekki greint frá eignaraðild Ólafs í tilteknu félagi þegar málið var afgreitt í borgarstjórn. Dagur hélt því leyndu eða leit svo á að ekki væri þörf að taka það fram. Síðar sáu borgarfulltrúar í fjölmiðlum, Dag borgarstjóra undirrita samninginn með Ólafi. Ég er ekki að halda því fram að samningurinn sé ólöglegur eða brot á sveitarstjórnarlögum, nei en að rifta samningnum er siðferðislega rétt. Ólafur hefur hlotið dóm og eftir skýrsluna góðu sést glögglega að viðskipti við þennan ágæta mann eru stórhættulegt. Það er ekki hægt að bjóða almenningi að skattfé þeirra renni í vasa hans, hann hefur fengið nóg frá íslensku þjóðinni.

Þeir eru svo miklir snillingar á Akranesi. HB Grandi hótaði að loka botnfiskverkun á staðnum og segja upp 93 starfsmönnum. Bæjarstjóri og bæjarfulltrúar voru ekki lengi að grípa tækifærið og lofa breytingum á hafnarsvæðinu. Þá spyr ég hvernig getur bætt aðstaða á höfninni bætt rekstarskilyrði vinnslunnar sem voru rökin við að leggja hana niður? Og seinni spurningin er hvernig getur Akranes lofað framkvæmdum Faxaflóahafna upp á 1,5 milljarða til að bjarga þessum störfum og við reykvíkingar borgum brúsann ? Ég neita að skattfé mitt fari í hafnarmannvirki á Akranesi. Hvet Akranes að skoða nýsköpunartækifæri á svæðinu og skapa ný störf og ef kostnaðurinn er einhver, þá greiði bæjarfélagið sjálft reikninginn.

Fjöldi samfélagsnetmiðla keyra reglulega á greinum um kynlíf. Hver hefur ekki rekist reglulega á greinar með fyrirsögnum í þess átt, „tíu leiðir til að fullnægja konunni“ og framvegis. Ein gríngrein þessu tengt var birt í vikunni. Sú grein var um 13 hluti sem á ekki að gera í kynlífi. Ég segi gríngrein þar sem talað var um að sleppa því að svara símtali frá mömmu þinni, ekki kreista bólu á bólfélaganum og að nota heilan ananas sem leikfang upp í óæðri endann. Ég vona svo innilega að enginn sé með heilan ananas sem hjálpartæki í ástarlífinu. Ég veit allavega að ég yrði fljótur að leggja á flótta ef einhver rifi upp ananas í öllu sínu veldi upp úr náttborðsskúffunni En svona greinar fá lesningu. Það er með ólíkingum. Ef þú ert í vanda að fullnægja maka þínum í rúminu þá þarf eitthvað að endurskoða allt ástandið í heild sinni. Ef þú nærð ekki að læra á þarfir maka þíns til margra ára þá ertu vart hæf/ur til að keyra bíl. Ef gagnkvæmur skilningur á þörfum makans liggur ekki fyrir eftir fyrstu vikurnar, þar sem mestum tíma er eytt í svefnherberginu þá eruð þið einfaldlega ekki að ná saman. Þá væri nær að lesa greinar á við „tíu leiðir til að slíta sambandi.“

The post FöstudagsÁrni: Sama hvað þú gerir… Ekki kreista bólu bólfélaga appeared first on Local Sudurnes.

Enn og aftur hefur komið til handtöku flóttamanna við Sundahöfn. Þar reyna einstaklingar að smygla sér um borð í flutningaskip á leið úr landi. Ég hef áður tjáð mig um þessi málefni, sér í lagi vegna þess að ég hef ekki skilning eða þekkingu á þessu máli. Fyrir mér er staðan slík að við erum með flóttafólk og hælisleitendur. Þeir síðar nefndu vilja setjast hér að, í flestum tilfellum fjölskyldur, en svo sér maður fréttir að heilu fjölskyldurnar sem hafa komið sér fyrir hérna, komin í vinnu og börn í skóla er vikið úr landi. Á hinn bóginn erum við með flóttamenn sem brjóta lög við það að reyna að komast héðan, en við höldum fast í þá. Svo ég dreg þetta saman, þá erum við að vísa úr landi fólki sem hefur aðlagast en pinum þá sem hafa engan áhuga á að vera hérna með því að halda þeim föngum. Það var athyglisvert að heyra í öryggisstjóra Eimskipa í útvarpsviðtali í vikunni. Hann óttast um starfsfólk bæði sem starfar við gæslu á svæðinu og líka um borð í skipum þar sem ekki er vitað um bakgrunn slíkra manna. Við gætum því auðveldlega verið að hýsa glæpamenn en fleygja fjölskyldufólki úr landi. Þetta mál er öfugsnúið og engin þorir að segja neitt til að vera ekki sakað um fordóma og rasisma. Manngæskan gæti verið dýrkeypt í þessu máli.

Ora auglýsing rúllar í fjölmiðlum og vekur athygli okkar á því að eitt af því fallegasta í íslenskri tungu er setningin „það er kominn matur.“ Já svo sannarlega hugljúf auglýsing, alla vega fyrir þá sem eiga fyrir mat. En það er þunn lína á milli jákvæðni og neikvæðni í okkar blessaða ylhýra móðurmáli. Við verðum að gæta okkar, það er fallegt að kalla, það er kominn matur – en að góla borða, hefur allt aðra merkingu. Það getur kallað á úlfúð meðal þeirra hungruðu og þess vegna brotist út með fordómafullum hætti. Það vill engin láta segja sér að borða, en að það sé kominn matur er auðvitað bara allt annað. Gætum okkar á beitingu móðurmálsins.

Hver man ekki eftir því að hafa verið lítill og óþroskaður og ekki viljað sitja hjá hinum eða þessum í grunnskóla? Eða bara við matarborðið? Jú við höfum flest öll upplifað þetta tímabil þegar við vildum ekki sitja hjá hverjum sem er, vildum velja skemmtilegan sessunaut, eða sætu stelpuna eða sæta strákinn í bekknum. Slíkur sandkassaleikur vex sem betur fer af okkur með þroskanum sem færist yfir okkur með aldrinum. En þessi sandkassaleikur sem þetta svo sannarlega er blossaði upp á Alþingi í vikunni. Pawal þingmaður Viðreisnar finnst ómögulegt að sitja með fólki sem er ekki á sömu skoðun og hann. En eins og flestum er kunnugt er dregið um sætaskipan á Alþingi óháð flokkslínum. Pawel vill sitja með sínum flokksfélögum, en situr uppi með sjálstæðismann og VG þingmann. Þetta er auðvitað engum boðlegt að eiga samskipti og skiptast á skoðunum og eiga víðtæk samtöl um framtíð íslensku þjóðarinnar við fólk sem tilheyrir öðrum flokkum. Spurning að stúka niður þingsalinn eins og við sjáum í réttunum á haustin. Getum eyrnamerkt þingmenn og dregið þá í dilka, það skapar eðlilegt umhverfi meðal þeirra sem vinna að málefnum þjóðarinnar.

Útvarpsmaðurinn Frosti komst í hann krappann þessa vikuna eins og oft áður. Að þessu sinni er ég nú sammála honum. Hef lent í þrasi vegna skoðunnar minnar á þessu máli. Mál Frosta snéri að umfjöllun um fátækt á Íslandi. Það var viðtal við unga konu sem er einstæð móðir og á von á fjórða barninu. Hún nær ekki endum saman og þarf að selja gras til að lifa. Skelfilegt að heyra svona sögur, en Frosti benti réttilega á að við verðum í raun að reikna dæmið til enda hvað varðar barnseignir. Það er mjög dýrt að eiga börn og fólk getur ekki stólað á að barnabætur og bótakerfi hlaupi að fullu undir með þann kostnað. Aðstæður eru að sjálfsögðu mismunandi, makamissir, heilsubrestur og fleira getur kippt stoðunum undan fjölskyldu. En í mörgum tilfellum er það ekki svo. Einstæð móðir að eignast fjórða barnið, og er ég ekkert endilega að tala um þessa tilteknu stúlku sem á hug minn allann. En come on, hefur fólk ekki heyrt talað um getnaðarvarnir? Jú slys gerast, en þegar fólk þarf orðið strumpastrætó undir grislingana þá er orðið tímabært að kynna sér smokkinn eða pilluna eða hreinlega láta þetta gossa á magann. Það fara allir hvort eð er í sturtu eftir kynlíf, þetta skolast vel af og í þokkabót fer þetta einstaklega vel með húðina.

Það er ekki tekið út með sældinni að vera leikari. Mikið vorkenni ég Hannesi Óla að þurfa að stoppa leiksýningu vegna niðurgangs. Þetta hefur verið að ganga upp á síðkastið og ekki heppilegt að fá þetta á sviðinu. Hann reyndi að harka af sér en stóð svo frammi fyrir því að frussa á sig á sviðinu aumingja maðurinn eða hreinlega koma sér á salernið. Það sem versta við þetta er að alþjóð veit að Hannes fékk niðurgang. Ömurlegt að vera svona frægur að það er bara komið í fjölmiðla ef maður fær í magann og til að toppa ástandið vek ég enn frekar athygli á skitu vikunnar í þessum pistli. Fyrirgefðu Hannes, þú ert yndislegur leikari, en ég bara gat ekki sleppt þessu mómenti.

The post FöstudagsÁrni: „það er kominn matur.“ appeared first on Local Sudurnes.