Reykjaneshöfn óskar eftir greiðslufresti – Boðað til kröfuhafafundar
Bæjarstjórn Reykjanesbæjar hefur hafnað ósk Reykjaneshafnar um fjármögnun til að geta staðið við greiðslur skuldbindinga sem eru á gjalddaga þann 15. október nk. Að öllu óbreyttu mun því koma til greiðslufalls á þeim tíma.
Hinn 2. október sl. óskaði Reykjaneshöfn eftir fjármögnun en í morgun ákvað bæjarráð að hafna beiðninni.
Hafnarstjórn Reykjaneshafnar hefur því ákveðið að óska eftir greiðslufresti og kyrrstöðutímabili frá kröfuhöfum til 30. nóvember næstkomandi. Boðað hefur verið til kröfuhafafundar þann 14. október nk. þar sem farið verður yfir stöðuna og tilkynnt hvort kröfuhafar hafi ákveðið að verða við óskinni. Þetta kemur fram í tilkynningu Reykjaneshafnar til Kauphallarinnar.
Kröfuhafafundur þann 14. október næstkomandi
Í tilkynningunni kemur jafnframt fram að Hafnarstjórn Reykjaneshafnar hefur ákveðið að óska eftir greiðslufresti og kyrrstöðutímabili frá kröfuhöfum til 30. nóvember næstkomandi.. Jafnframt er boðað til kröfuhafafundar þann 14. október næstkomandi klukkan 10:00 í húsakynnum LOGOS lögmannsþjónustu, Efstaleiti 5, Reykjavík. Á dagskrá fundarins eru eftirfarandi mál:
a) Kynning á fjárhagsstöðu Reykjaneshafnar.
b) Tilkynnt um samþykki kröfuhafa á greiðslufresti og kyrrstöðutímabili.
c) Ákvörðun um fyrirkomulag viðræðna og skipan kröfuhafaráðs..
Að loknum fundi við kröfuhafa verður tilkynnt um hvort kröfuhafar hafi orðið við beiðni um greiðslufrest og kyrrstöðu.
Tilkynningu Reykjaneshafnar til Kauphallarinnar má finna í heild sinni hér.