Flottur Njarðvíkursigur í Vesturbænum – Grindavík í þriðja sætið eftir öruggan sigur
Björn Kristjánsson átti góðan leik, eins og allt Njarðvíkurliðið, í 72-61 sigri á Íslands- og bikarmeisturum KR. Björn skoraði 24 stig og tók 5 fráköst. Jeremy Atkinson gerði svo fína tvennu í leiknum með 18 stigum og 10 fráköstum.
Njarðvíkurliðið kom vel undirbúið til leiks og átti svör við flestum aðgerðum KR-inga í þessum leik, vörnin hélt sóknarnýtingu KR-inga í algjöru lágmarki, hvort sem um var að ræða tveggja-, þriggjastiga- eða vítakot, og ljóst að koma Atkinson þéttir vörnina vel. Þá gekk sókn Njarðvíkinga eins og smurð vél.
Björn Kristjánsson skoraði sem fyrr segir 24 stig og Jeremy Atkinson 18, Logi Gunnarsson kom svo næstur með 14 stig.
Grindavík náði í sinn sjötta deildarsigur á tímabilinu þegar liðið lagði botnlið Snæfells í Mustad-höllinni í Grindavík, 108-72. Með sigrinum komust Grindvíkingar í þriðja sæti deildarinnar, hafa 12 stig líkt og topplið KR og Stjörnunnar sem er í öðru sæti.
Lewis Clinch Jr. var með 25 stig fyrir Grindvíkinga og Dagur Kár Jónsson var með 18 stig.