Nýjast á Local Suðurnes

Teknir með umtalsvert magn af þýfi – Ekki nógu sterkir til að stela öllu sem þeir vildu

Lögreglan á Suðurnesjum handtók um helgina tvo menn sem voru með umtalsvert magn af þýfi í bifreið sinni. Þá var annar þeirra grunaður um fíkniefnaakstur og á hinum fundust meint fíkniefni.

Í tilkynningu frá Lögreglunni á Suðurnesjum kemur fram að mennirnir hafi verið að týna ýmsa muni upp í bifreið sína úr geymslu við fyrirtæki í umdæminu þegar eiganda þess var gert viðvart um háttsemi þeirra. Hann reyndi að stöðva för þeirra af staðnum en þeir létu sér ekki segjast. Lögreglu var gert viðvart og stöðvaði hún þá á Reykjanesbrautinni þar sem þeir voru á heimleið úr leiðangrinum á Suðurnesin.

Í bílnum fundust tugir málmeininga, gafflar af lyftara og loftpressa fyrir kælikerfi. Þá höfðu mennirnir haft viðkomu á öðrum stað í umdæminu þar sem þeir hugðust kippa með sér skipsskrúfu en hún reyndist of þung. Þeir játuðu sök og höfðu ætlað að selja þýfið í brotajárn.