Sveitarfélögin á Suðurnesjum hafa náð góðum árangri í læsisverkefnum

Illugi Gunnarsson mennta- og menningarmálaráðherra og Gylfi Jón Gylfason verkefnastjóri hjá Menntamálastofnun hafa á undanförnum vikum farið um suðvesturhorn landsins til þess að undirrita þjóðarsáttmála um læsi, en verkefninu var hleypt af stokkunum 24. ágúst sl. þegar sáttmálinn var fyrst undirritaður í Borgarbókasafni. Auk menntamálaráðherra skrifar bæjarstjóri hvers sveitarfélags og fulltrúi frá landssamtökunum Heimili og skóli undir sáttmálann. Lítil útgáfa sáttmálans er einnig undirritaður, honum rúllað upp og stungið í Íslandslíkan.

Í máli ráðherra kom fram að Pisa kannanir gæfu sterkar vísbendingar um að hér þyrfti að spyrna við fótum en ekki síður sú staðreynd að námsframvinda sé lökust á Íslandi af öllum OECD löndunum. Það þýðir að Ísland vermir botninn þegar kemur að fjölda þeirra sem ljúka framhaldsnámi á tilsettum tíma. „Meðalaldur þeirra sem útskriftast úr grunnnámi í háskóla eru rúmlega 30 ár. Það þýðir að við erum skemur á vinnumarkaði sem hlýtur að hafa áhrif á allt efnahagskerfi okkar.“

Illugi tók þó fram að margt gott hefði átt sér stað í íslensku menntakerfi og tók sérstaklega fram hversum góðum árangri Reykjanesbær og samstarfssveitarfélögin Garður og Sandgerði hefðu náð í læsisverkefnum sínum. Þær góðu vísbendingar sem ætti að byggja á sagði Illugi vera þær staðreyndir að börnum liði betur og betur í skóla og að námsárangur skýrðist ekki aðeins út frá skólum, því þeir væru jafnir. „Vegna þess hversu jafnir skólarnir eru reynist auðveldar að jafna tækifæri barna. Barn sem ekki les sér til gagns við lok grunnskóla hefur ekki sömu tækifæri í lífinu hvað varðar framhaldsnám og atvinnu síðar meir. En það er ekki bara skólanna að vinna að bættu læsi heldur ekki síður heimilanna, þar liggur þjálfunin.“

Það var Kjartan Már Kjartansson bæjarstjóri Reykjanesbæjar og Anna Sigríður Jóhannesdóttir frá Heimili og skóla sem undirrituðu sáttmálann ásamt Illuga.