Rakadrægur föstudagspistill Árna Árna

Tendrað var á ljósunum á síðasta Oslóartrénu á Austurvelli um síðustu helgi. Framvegis mun Osló gefa Reykjavík íslenskt jólatré úr Heiðmörk. Ég er bara að spá í fyrirkomulaginu á þessu, Heiðmörk er í eigu Reykjavíkur og mun þá ef ég skil þetta rétt, selja Osló jólatré sem Osló gefur síðan Reykjavíkurborg, eða hvað? Getur Reykjavíkurborg ekki þá bara náð í þessa hríslu sjálf og frelsað Osló undan þeirri kvöð að gefa okkur tré ?

Árni Árna

Út í norður Atlantshafi stendur lítil eyja og á þessari litlu eyju er smáborgin Reykjavík sem er eins og fylki í Bandaríkjunum þegar vetrarríkið færist yfir. Íbúar utan fylkisins flissa yfir ástandinu í þessu litla kanaríki. Bílar fastir, árekstrar, umferðatafir slíkar að fólk situr klukkustundunum saman í bílum sínum þegar slydda tekur. Meira segja starfsmenn á snjóruðningstækjum eru ekki að ná að tækla ástandið og ílla útbúnir fjölskyldubílar sitja fastir hingað og þangað á meðan í öðrum bæjum skokkar sjálfur bæjarstjóri á milli bæjarfélaga og mokar eldri borgarana út úr sköflunum eins og ekkert sé. Kanaríkið er stjórnlaust og í uppnámi eins og það hafi aldrei snjóað fyrr, aldrei þurft að riðja götur og að negld dekk séu nýlunda. Svo situr borgarstjórinn sem nennir ekki út að moka eins og kollegar hans, á skrifstofu sinni og vill þrengja vegi og að allir borgarbúar fái sér reiðhjól í veðraparadísinni Reykjavík.

Vigdís Hauksdóttir þingmaður og formaður fjárlaganefndar er svona gella sem væri valin vinsælasti keppandinn í ungfrú Ísland, eða hvað. Hún er ótrúleg að sanka að sér vinsældum þessi elska. Hún er með svona frystihúsakjaft, þið vitið hvað ég á við sem unnu í frystihúsi. Ég gerði það sem unglingur og þar voru margar hverjar konurnar harðar og létu ekki vaða yfir sig og voru óhræddar að rífa kjaft. Vigdís hafnar andlegu ofbeldi af hálfu yfirstjórnar Landspítalans sem hefur óskað eftir hærri fjárframlögum. Nú er svo að fyrrum flokkssystir hennar vill fara fram á sjúkdómsgreiningu á Vigdísi svo það er spurning hvort yfirstjórnin greini þetta ekki sem bráðatilfelli og taki Vigdísi framfyrir í röðinni og ráðist í þetta verðuga verkefni. Annars hefur hroki ekki verið ennþá skilgreindur sem sjúkdómur heldur meira svona frekja. Það verður seint frá henni Vigdísi tekið að hún sé ekki hreinlega að kafna úr frekja og sjálfri sér og það er á hreinu að hún á ekkert erindi við þjóðina.

Listhneigðin á sér margar og djúpar rætur og tekur á sig ótrúlegustu myndir, enda endurspegla listamennirnir flóruna hver með sínu nefi. Ég man eftir því þegar lambi var komið fyrir á stolpi og það lak úr því blóðið og núna vekur ungur listnemi athygli fyrir að vera nakinn í kassa. Almar Atlason ætlar að dvelja í kassa í heila viku á Adamsklæðunum og geta gestir og gangandi fært honum mat og afþreyingu í gegnum lúgu og hefur meiru góðgæti verið gaukað að honum en heimilislausum á Lækjartorgi. Þetta form listarinnar er þrándur í götu margra enda er túlkun manns á listinni misdjúp. Ég til að minna finnst þetta bara vera steik dæmi og allt að því bara subbulegt. Hægt er að horfa í beinni á netinu og ég spyr hvernig á maðurinn eigilega hægðir með enga salernisaðstöðu ? Æi ég er bara eitthvað lítið fyrir kúk og piss í kassa og eitthvað, ég skil ekki þennan gaur en óska honum góðs gengis og óska honum velfarnaðar við að koma út úr kassanum.

Jóladagatal Ríkissjónvarpsins er að þessu sinni á dönsku með íslenskum texta. Erum við búin að afhenda dönum fyllveldið að nýju ? Mikil reiði ríkir á samfélagsmiðlum og greindi ein móðir frá því að símadama í Efstaleitinu var bara með skæting þegar móðirin hafði samband við ríkisstofnunina sem talsetur erlent efni yfir á okkar ylhýra tungumál, en tekur upp innlent efni á erlendu tungumáli. Hvernig ætla hollvinasamtök RÚV að verja þennan gjörning? Það má aldrei hafa skoðun eða leggja til neinar breytingar þá eru þessi hollvinasamtök eins og angi af einhverjum sértrúarsöfnuði – þetta er ólíðandi að sjónvarpsstöð í eigu landsmanna framleiði barnaefni á öðru tungumáli.

Björt Ólafsdóttir þingmaður Bjartrar framtíðar snéri til baka á þing úr barneignaleyfi og byrjaði daginn á orðunum „takk fyrir ekkert“ þar sem ég er ekki mikill aðdáandi hennar nennti ég ekki að lesa alla fréttina að dreg þá ályktun að þarna sé um að ræða dulin skilaboð til þjóðarinnar. Björt er að senda okkur tóninn fyrir stuðninginn í skoðunarkönnunum, en Björt framtíð fær EKKERT í þeim og stefnir í að atvinnuleysi blasi við Björt og félögum í þingflokki Bjartrar framtíðar.

Í heimi hinseigin fólks hefur umræðan síðustu daga verið um það hvort það geti verið að harðar sé tekið á samkynhneigðum innan dómskerfisins á Íslandi. Nýlegir dómar kalla fram umræðu hvað þetta varðar. Á dögunum var karlmaður sýknaður eftir að hafa átt samleyti við 14 ára fatlaða stúlku á meðan samkynhneigður karlmaður fékk 2ja ára dóm fyrir munnmök við gagnkynhneigðan karlmann gegn hans vilja. Þá vekur lærstroku-dómurinn úr Vesturbæjarlaug undrun á sama tíma og fimm karlmenn sem skiptust á að misnota drukkna unglingsstúlku voru einnig sýknaðir. Hvar er siðferðin í öllum þessum kynferðisafbrotum? Jú þetta eru allt brot en miðað við stærð brotanna ef svo má að orði komast, er eðlilegt að hinseigið fólk velti fyrir sér eigin sanngirni innan dómskerfisins.

Kjánalega dræm kosningaþátttaka var íbúakosningu Reykjanesbæjar í vikunni, alla vega miðað við síðustu tölur sem ég heyrði. Þá voru ríflega 600 búnir að kjósa en rúmlega 2000 manns skrifuðu undir kröfuna um kosninguna. Enn og aftur sjáum við þá sönnun að undirskriftalistar er ekki marktækir, það er hægt að fá fólk til að skrifa undir allann fjandan. Enda eins og ég hef áður tjáð mig um þá var þessi kosning falskt lýðræði til fólksins þar sem bæjarstjórn er ekki bundin að niðurstöðunni og verkefnið í Helguvík langt á veg komin og ekki verður hætt við úr þessu. Þetta var í rauninni bara kostnaður sem fellur á íbúa vegna þeirra sem skrifuðu undir. Ég styð aukið íbúalýðræði, en það þarf að vera marktækt og unnið á faglegum forsendum. Sama má segja um íbúalýðræðið okkar hérna í borginni, en þar fáum við að kjósa um lítillát verkefni í okkar hverfum. Viljum við göngustíg hér eða þar eða á að kasta niður rólu eða hríslu.

Það er nú svo að stundum er maður ekki alveg meðvitaður um hlutina eða ekki bara í sambandi stundum. Freyja Haralds var virkilega reið í vikunni, svo reið að hún sofnaði reið og vaknaði reið allt útaf degi fatlaðra. Ég er bara svo vitlaus að ég hélt að fatlaðir fögnuðu þessum degi. Degi þar sem málefni fatlaðra eru í fókus og vakin er athygli á stöðu fatlaðra í samfélaginu. Nei þetta átti ekki við um Freyju. Hún var reið vegna þess að það eru ófatlaðir sem skipuleggja dag fatlaðra. Ófatlaðir fengu viðurkenningar og í þokkbót var haldin hátíð í óaðgengilegri Hörpu. Ég verð að viðurkenna að ég hreinlega skil ekki Freyju í þessu máli. Það er fjöldi ófatlaðra sem vinna að málefnum fatlaðra og margir hverjir í sjálfboðavinnu með það að markmiði að auka lífsgæði fatlaðra og þátttöku þeirra í samfélaginu. Þá undrast ég að hún drulli yfir Hörpu, það er nú heldur betur rýmið þar, gott að komast að henni, fjöldi lyfta upp á allar hæðir, sérstök svæði í sölum fyrir hjólastóla, Harpa er hönnuð með aðgengi fatlaðra að leiðarljósi. Það býr einhver innri reiði þarna sem þarf að skola út, Freyja er oft á háa C-inu ég hvet þessa elsku til að anda að sér og skoða heildarmyndina í þessu samhengi.

Heiða Kristína Helgadóttir þingmaður Bjartrar framtíðar spurði eins og ekkert sé hvers vegna það sé verið að skattleggja á henni legið. Nú veit ég ekki hvað hún á mörg börn og hver kostnaðurinn er að barnabótum á hennar heimili og get því ekki svarað spurningunni. En hún átti víst við um skattlagningu á dömubindum og túrtöppum. Henni verður að ósk sinni þar sem stefnt er að því að fella niður tolla á þessar leg-vörur sem ætti að gera rekstur kvenna á miðsvæðinu ódýrari. Þá er ánægjulegt til þess að vita að á meðan kvenþjóðin fjárfestir í ódýrari rakabúnaði getum við karlmennirnir keypt ódýrari mjöður til að halda okkur rökum því til stendur að gera skattabreytingar á 72% vöruflokka í Vínbúðum sem á að skila sér í lægra vöruverði.