FöstudagsÁrni þorir ekki í þyrluflug með Ásdísi Rán

Föstudagspistillinn er að flýta sér í þetta skiptið. Ég á orðið í leynilegu ástarfsambandi við skurðarborðið á 13B á Landspítalanum. Er aftur lagstur undir hnífasettið þar á bæ í von um áranguur í þetta skiptið – Síðustu 5 vikur hef ég verið með 15% sjón og þið sem ég hef mætt en ekki heilsað, þá er ég ekki svona merkilegur með mig, sé bara ekki rassgat. (Pistillinn er skrifaður punktastærð 28)

Þvílík vika, ég veit eigilega ekki hvar er best að byrja, eða hvort ég ætti bara að sleppa því. Þessi vika er búin að vera algjör sandkassaleikur í hinu pólitíska amstri og bara í raun hundleiðileg.

Árni Árna

Á meðan leikskólastjórar í Reykjavík eru bugaðir af fjársvelti og sjá sér ekki glaðan dag með Degi, enda svifryksmengunin í hæstu hæðum þar sem ekki verða þrifnar göturnar. Sóley Tómasdóttir borgarfulltrúik sem gefur sig út fyrir að vera að kafna úr umhverfisvitund, gefur lítið fyrir mengun í borginni og fer í fótspor Sigga storms og spáir rigningarsumri svo hægt verði að spara rúmar 3 milljónir. Megi almenningur hósta úr sér lungun og liggja í asmakasti um stræti og torg, VG umhverfisflokkurinn þarf að spara.

Á hinn boginn er tekist á um of mikla peninga meðal þingmanna – þar að segja þingmenn sem eiga ekki nóg ráðast á það sem eiga meira. Ég er orðinn svo ringlaður í þessari umræðu um bankainneignir á erlendri grundu að ég veit ekki lengur hvort himininn sé blár. Fyrsta lagi skil ég ekki hvað mér eða öðrum komi við hvað aðrir eiga í banka, en ég veit samt að sumir eiga meira og ætla ekki að grenja það, hver er sinnar gæfusmiður. EN einnig skil ég ekki hvernig hægt er að tala um fjármagn í skattaskjóli þegar greiddur er af því skattar – hvernig getur það verið skjól? Þá virðist ekki vera sama um hvern ræðir í þessum efnum. Jafnaðarmenn nýta sér málið enda ekki veitir af að reyna að kroppa aðeins in fylgi þar sem það er týnt og tröllum gefið. Ég rifja upp vitleysuna þegar Jóhanna Sigurðardóttir var forsætisráðherra og þá mátti ekki nokkur kjaftur í landinu vera með hærri laun en hún – svo mikill átti jöfnuðurinn að vera. Samst sem áður er einn forkólfur flokksins einn af þeim íslendingum sem á fjármagn í svokölluðu skattaskjóli en greiðir samt af því skatta. Það er allt öðruvísi en hjá til að mynda Bjarna Benediktssyni, sem átti félag sem greiddi skatta en var lagt niður. Hver er munurinn á kúk og skít spyr ég bara? Eru fleiri en ég gáttaðir á umræðunni?

Til að toppa þetta allt saman er búið að hóta vantrauststillögum á forsætisráðherra og ríkisstjórnina af þeim þingmönnum sem samþykktu Icesave samninginn og stefnu með honum þjóðinni beint í öreigð. Þá er búið að blása til mótmæla, já í alvöru. Efnahagslíf þjóðarbúsins hefur aldrei verið betra, verðbólgan er týnd, stakk af með fylgi Samfylkingarinnar. Hagvöxturinn er í ljóma sínum, tollar í lágmarki, tekjuskattur á niðurleið, atvinnuástandið sjaldan verið svona gott, uppbygging bæði í atvinnumálum og húsnæðismálum í góðri siglingu. Æ fleiri að festa kaup á eigin húsnæði og framvegis. Þetta er auðvitað hreinn viðbjóður, hver vill eigilega búa við svona ástand? Auðvitað þurfum við að brjóta niður þennan hræðilega stöðugleika og koma á pólitískum óstöðugleika, leita uppi verðbólgu og greiða hærri skatta, það er draumurinn. Svo að sjálfsögðu þurfum við í mótmælunum að kveikja í eigum skattgreiðenda og ráðast á byggingar og annað lauslegt sem við eigum sjálf. Þessi þjóð er að tapa sér í ruglinu. Ég legg til að dælt verði róandi lyfjum í neysluvatnið bara til að tóna aðeins niður múæsingin.

Á sama tíma og minnihlutinn vill rjúfa þing og ganga til kosninga í von um að koma árum sínum betur frá borði eru gögn Samfylkingar og VG úr síðastu ríkisstjórn harðlokuð í rúm 100 ár – þessir flokkar keyrðu á tískuorðinu „Gagnsæi“ en fóru hulduhöfði allt kjörtímabilið, Jóhanna nánast henti sér í höfnina ef hún sá blaðamann hún var svo hrædd um að þurfa að veita viðtal. Ef það á að ganga til kosninga núna þarf að aflétta leyndinni af þessum gögnum svo kjósendur geti í raun kynnt sér vinnubrögð vinstri stjórnar sem vill jöfnuð fyrir alla – en mega sjálf eiga peninga erlendis.

Já það er alltaf fjör í Leifsstöð. Á sama tíma og bílastæðagjald starfsmanna hækkar úr 1000 kr. á ári í 2000 kr. á mánuði er fjárfest í norðurljósalýsingu fyrir tæpar 200 milljónir. Nú þurfa túristar ekki að fara út úr flugstöðinni – kannski verður boðið upp á norðurljósaflug með Icelandair beint í dinner í flugstöðina þar sem norðurljósin leika um svæðið og bara flogið beint heim aftur. Ferðamenn þurfa ekkert að koma inn í landið. Þá er spurning hvort það verði ekki bara sett upp bláa lóns- spa, fáum lítinn Kekó í kar líka svo flugstöðin steli allri athygli frá ferðaþjónustunni.

Nú veit ég ekki hvort þarna sé beintenging á milli en ég rak augun í að Ásdís Rán er orðin þyrluflugmaður, og að þyrla Landhelgisgæslunnar nauðlenti. Ég biðst afsökunar á þröngsýninni en það má bara bjóða mér allt annað en þyrluflug með Ásdísi Rán. Ég er nógu smeykur þegar greint er frá því að hún sé á landinu og eiga það í hættu að verða á vegi hennar út í umferðinni.

Ég er nú einn af þeim sem get ekki alveg hlustað á þau rök að hryðjuverk séu komin til að vera og við þurfum bara að aðlagast breyttu ástandi í heiminum. Ég fyllist óhug og samkennd og verð að viðurkenna að stundum hverfur löngunin til að ferðast. En rólegur gaurinn í flugvélinni sem var rænt og neydd til lendingar á Kýpur. Það var bara tekin slefie með flugræningjanum. Ég væri með eitthvað annað í huga sæti ég í flugvél í miðju flugráni en að vilja eina mynd af mér með hinum seka. Meira væru áhyggjurnar hvort þeir sem sætu mér næst finndu hlandlyktina eftir að ég pissaði á mig úr hræðslu – sumir eru bara ekki alveg að átta sig á ástandinu að mínu mati.

Góða helgi