FöstudagsÁrni – Öreigar sameinaðir undir bleiku skýi jafnaðarstefnu

Rússneskir hrekkjalómar náðu fram upplýsingum upp úr Ingrid Deltenre, framkvæmdastjóri EBU, að Eurovision gæti verið færð til Berlínar.Ég fer nú bara í tilfinningarlegt uppnám þegar ég hugsa til baka er Úkraína bar sigur úr býtum í keppninni á síðasta ári. Lagið er vægast sagt skelfilegt. Fyrir Eurovision homma eins og mig þá brást Evrópa í málinu. Þetta er keppni um besta lagið, ekki um mannréttindabrot eða stríðsátök. Að kjósa leiðilegasta og ljótasta lagið í keppninni er óafsakanlegt. Hugur minn er hjá öllum sem upplifa mannréttindabrot, ofbeldi og stríðsátök, en Eurovision hefur verið sameiningartákn álfunnar, fært listamenn saman í bróðerni , en þetta er samt keppni. Besta lagið á að sigra, auðvitað er misjafn smekkur manna en ég hef ekki ennþá hitt einhvern sem var ánægður með úrslitin. Er einhver þarna úti sem man hvernig lagið var, og hvað þá að geta raulað með? Nei hélt ekki. Við íslendingar höfum verið sigurvissir síðan Gleðibankinn hélt utan 1986, en ég er sannfærður um að Svala B. landar sigrinum að þessu sinni. Meira segja Þorgerður Katrín, sjávarútvegs- og landbúnaðarráðherra er sannfærð. Hún er að skella á auðlindagjaldi á fiskeldin til að hala inn aukatekjur til að mæta kostnaði við Eurovision 2018 in Reykjavik Iceland.

Það er yndislegt að búa í borg þar sem takmarkað aðgengi er að húsnæði. Undir öruggri leiðtogahæfni borgarstjórans styrkjum við fjölskylduböndin, já unga fólkið er lengur í foreldrahúsum og til að þrýsta hópnum ennfrekar saman hafa hækkanir á leigu til eldri borgara skilað þeim frábæra árangri að eldri borgarar flytja inn á börn sín. Munið hvað þetta var huggulegt í gamla daga, hafa ömmu og afa inn á heimilinu, stórfjölskyldan saman komin undir sama þakið í sátt og samlyndi líkt og í kvikmyndinni Djöflaeyjan. Þeir fáu sem ná sér í húsnæði gera það í gegnum félög sem reistu ekki fasteignir í gróðraskyni samkvæmt borgarstjóra. Hver dregur það í efa þótt Búseti á norðurlandi hafi skilað 181 milljón í hagnað á árinu 2015. Hugsjónin er falleg, það skiptir sköpum. Þessir fáu útvöldu sem brjóta mynstrið og veikja stefnu borgarstjóra um sameinaðar fjölskyldur þurfa til að mynda að greiða 6,5 milljónir við afhendingu 3ja herbergja íbúðar hjá Búseta og greiða ekki nema 272 þúsund í leigu á mánuði. Þetta geta sem betur fer fáir, jafnaðar- fjölskyldustefnan blómstrar í okkar yndislegu borg. Ég fór á hárgreiðslustofu í vikunni og sá sem réðist með skærin að vopni á lubbann er 42 ára. Hann missti leiguíbúðina í 101 og hefur engan veginn ráð á því að leigja. Hann er fluttur inn á foreldra sinna. Sjáið fegurðina í stöðunni. Við þurfum ekki einu sinni að hringja einu sinni í viku í mömmu og pabba, við köllum bara úr stofusófanum til að fá upplýsingar um kvöldmatinn. Förum svo út með ruslið og horfum svo öll saman á sjónvarpið. Ég er handviss um að þegar öll nýju hverfin sem borgarstjóri lofaði fyrir síðustu kosningar og lofar aftur núna, þá langar engum að flytja úr foreldrahúsum. Öreigarnir í borginni hafa verið sameinaðir undir bleiku skýi jafnaðarstefnunnar.

Tek ofan fyrir Ikea, þar er ekki legið yfir hugsjónum og gefnum loforðum, þar er framkvæmt. Fyrirtækið hefur ráðist í byggingu fjölbýlishúss þar sem starfsfólki gefst kostur að leigja íbúðir. Það er ekki nóg að Ikea flúði Reykjavík rétt eins og Íslandsbanki, hluti rekstrar Icelandair og senn Wow air, þá er Ikea að ná íbúum líka yfir í Garðabæinn. En hey látum ekki svona Reykjavíkurborg er með þetta allt saman á framtíðarplaninu, þetta kemur eins og maðurinn sagði. Ikea hefur kynnt lausnir í húsnæðismálum, hús frá fyrirtækinu sem eru ódýrari og gætu leyst hluta vandans. Enginn hlustaði og hvað þá framkvæmdi eða ýtti undir að þarna væri kostur sem mætti skoða. Við þurfum að þrasa minna og gera meira, það er nokkuð ljóst.

Bessastaðabóndinn okkar, Guðni Th. var rassskelltur í sjónvarpsviðtali í Rússlandi á dögunum. Ég er hræddur um að forseti vor hafi verið hálf aumur eftir útreiðina. Ég er ósáttur við hátterni fréttakonunnar sem fór offari í þessu viðtali. Ég tel mig hafa einkarétt á því að gera góðlátlegt grín af forsetanum okkar og aðeins hníta í hann í léttum tóni, en tek upp hanskann fyrir hann þegar aðrir gera það. Fréttakonan lét eins og forseti Íslands væri álíka valdamikill og forseti Bandaríkjana. Guðni lítur fyrst og fremst á sig sem sameiningartákn þjóðarinnar. Svo er hægt að velta því upp hvort við séum of hliðholl Bandaríkjunum, erum við að taka afstöðu sem er of einhæf í utanríkismálum? Það er viss skoðun út af fyrir sig. Guðni kom því miður hræðilega út úr viðtalinu og ég gat ekki annað en hugsað til forvera hans, Ólafs Ragnars og hvernig hann hefði snúið rassskellinum yfir á fréttakonuna.

Mikið var ég spenntur þegar ég sá frétt þess efnis að franskir vísindamenn leita að karlmönnum til að kúra upp í rúmi í 2 mánuði og fá fyrir það greitt 2 milljónir króna. Mér leið eins og ég væri að detta í lukkupottinn og opnaði fréttina. Þá er þetta rannsókn á vegum geimvísinda til að kanna hvernig þyngdarleysi geimfara hefur áhrif á líkama þeirra. En það kemur ekkert fram um að þessir 24 karlmenn fái að kúra með hvort öðrum, las á milli línanna að hver og einn væri í sér rúmi. Ég snarlega hætti við að sækja um, enda eyðilögðu þeir algjörlega stemminguna með kröfu um einhverja þyngdarstuðla. Svo halda sumir því fram að það séu forréttindi að vera miðaldra, hvítur, mjúkur hommi.

Alveg ótrúlegt atvik sem ég lenti í núna í vikunni. Fór seint að kvöldi með pappír í endurvinnslutunnurnar í ruslageymslunni. Haldið þið að þar hafi ekki verið maður liggjandi út í horni í myrkrinu. Þarna var á ferðinni þingmaður ónefnds stjórnmálaflokks. Hann flakkar víst á milli geymsla í borginni í leit að húsaskjóli. Hann var víst með niðurgreidda íbúð meðal stúdenta en það þótti víst ekki við hæfi. Samflokksmaður hans greindi fyrir skemmstu frá því að laun þingmanna eru það bágborin að ekki er hægt að nýta þau til að fjárfesta í eigin húsnæði. Ég hvet borgarbúa að henda ekki matarleifum, heldur setjum á disk og köstum kannski einu vatnsglasi með í ruslageymslurnar, þessi grey þurfa næringu, það lifir enginn á þingfararkaupi það er nokkuð ljóst.

Góða helgi