FöstudagsÁrna yrði hent öfugum upp úr lauginni með sína skálastærð

Þessi vika hefur í fréttalegu tilliti verið erfið. Áherslan hefur að sjálfsögðu verið á eitt mál sem er mjög eðlilegt. Hvarf Birnu Brjánsdóttur er að þróast í að vera eitt skelfilegasta sakamál síðustu ára og samhugur þjóðarinnar er hjá fjölskyldu hennar. Ég er gagntekin af þessu máli en ætla ekki að tjá mig um það, nema að ég er virkilega stoltur af Lögreglunni, Grími Grímssyni og björgunarsveitunum okkar. Lögreglan hefur unnið málið af mikilli fagmennsku, skipulagi og aga og hefur sýnt og sannað hversu megnug hún er. Ég tek ofan fyrir Lögreglu og bjórgunarsveitum.

Mikið væri nú skemmtilegt ef Putin og Thrump héldu leiðtogafund í Reykjavík. Þarna eru að ferðinni miklar mannvitsbrekkur og sannir mannvinir. Ég legg til að slegið verði upp málþingi um réttindi hinsegin fólks og þeir félagar taki þátt í pallborðsumræðum um málefnið. Það er örugglega mikið sem liggur á hjarta Putins um málið. Þá er ég reiðubúinn til að leggja mitt að mörkum og fara með þá félaga á gay-djamm í miðborginni og taka snúning með þeim á Kíki bar.

Voðaleg læti eru þetta yfir brjóstum á Akranesi. Voðaleg viðkvæmni er þetta. Fólk eyðir löngum stundum fyrir framan viðtækin þar sem endalausar kynlífssenur rúlla allan sólarhringinn. Falleg brjóst slá svo menn út af laginu í sundi. Tvöfalt siðferði eins og við þekkjum það í Bandaríkjunum þar sem stórhluti alls kláms er fest á filmu, en geirvartan á Janet Jackson sprengdi upp samfélagið með látum. En það er gott að vita hvert á ekki að fara í sund. Ég yrði örugglega rekinn upp á Akranesi með skálastærðirnar mínar, ég segi bara áfram konur og áfram frelsi.

Verðlag á Íslandi er ávallt í umræðunni. Góður vinur minn á racer mótorhjól sem bilaði á dögunum. Hann hafði samband við umboðið og varahluturinn kostaði 130 þúsund krónur. Hann fór á netið og fann varahlutinn á 30 þúsund. Það skyldi engan undra að fólk sé pirrað þegar flutningskostnaður og álagning veldur slíkum verðmun. En hvernig getum við ætlast til að kaupmenn stilli græðgi sína í hóf þegar ríkið sýnir ekki fordæmi. DV birti frétt í vikunni sem sýndi að vínflaska sem kostar 444 kr. í innkaupum er seld til viðskiptavina á 5.290 kr. Þessi frétt er sönn, ég vann verkefni í opinberri stjórnsýslu á sínum tíma þar sem ég fylgdi eftir rauðvínsflösku frá framleiðenda á Spáni og upp í hillu vínbúða. Þetta er bara eitt af því sem hreinlega engin skilur, alla vega engin með réttu ráði. Ég hvet ríkisstjórnina til að hætta ofursköttun og smásölu, látum einkaframtakið ráða ferðinni.

Indverskt flugfélag hefur nú sölu á sérstakri sætaröð í flugvélum sínum fyrir konur. Ástæðan er sú að konur verða fyrir miklu áreiti um borð í vélum flugfélagsins. Við vitum að virðing í garð kvenna á Indlandi er oft á tíðum bágborin, svo ég taki vægt til orða. Þetta með sér flugsæti er kannski ágætis ráð, en þarna finnst mér eins og konur séu sendar í skammarkrókinn. Eftirgjöf í málinu í stað þess að þeir sem áreita aðra um borð séu hreinlega handteknir eftir lendingu. Væri það ekki öflugri skilaboð til gernda á Indlandi. Í staðinn hefur frasin um „viltu reyklaust sæti?“ síðan í den fengið nýja merkingu hjá ingverjum, „viltu sæti í áreiti?“ – algjör eftirgjöf í málinu og viðheldur í raun kvenfyrirlitningunni sem á Indlandi ríkir.

Ég hef áður viðurkennt fyrir ykkur hvað ég er skelfilegur í eldhúsinu. Ég legg það ekki á nokkurn mann að koma í mat til mín, þeir sem hafa lent í því hafa ekki sýnt til þess vilja að koma aftur. Nú gæti tæknin komið mér til hjálpar. Í lok árs kemur á markað ísskápur sem talar við mann, býr til innkaupalista og les upp uppskriftir fyrir mann. Þetta er virkilega hentugt og kvikindið kastar bara 700 þúsund í Bandaríkjunum. Miðað við smurhníf íslenskra kaupmanna þá verður hann á sirka 2 milljónir á Íslandi. Þar sem ég er einhleypur og leiðist stundum sitjandi einn heima á kvöldin, er spurning hvort ég selji bílinn, kaupi Strætókort og ísskápinn. Þá er ég kominn með félagsskap á heimilið. Japla á betri mat og spjalla einfaldlega við ísskápin. Hver þarf maka nú til dags?