Nýjast á Local Suðurnes

Árni Árna spáir meðal annars í Vigdísi Hauks og partývinkonunum

Það er ekki tekið út með sældinni að leigja sumarbústað af Kennarasambandinu. Grálúsugir bústaðirnar skila þér útbitnum heim og þú þarft sjálfur að eitra, eða láta þetta bara eiga sig og velta ábyrgðinni yfir á næsta kennara. Ótrúleg saga stéttarfélags sem hunsar ástandið. Ég hef gist í mörgum stéttarfélagsbústöðum í gegnum tíðina en þakka fyrir að hafa ekki sótt kennarabústaðina heim. Það má þá með sanni segja að það liggi fyrir að upp komi lúsatilfelli fljótlega eftir skólasetningu þegar kennararnir mæta iðandi til baka úr sumarfríinu.

local

Árni Árnasson

Hún var hress á því hún Kolfinna Sjöfn 11 ára sveitastelpa á Suðurlandinu. Þessi yndislegi krakki rekur hænsabúið Harpa í heimahögunum og var spurð afhverju búið heitir Harpa? „Nú eins og Harpa í Reykjavík sem verður alltaf rekin í tapi,“ svaraði sú stutta.

Smásöluvísitalan sýndi að þjóðin verslaði óheyrilega mikið af áfengi í júlí, samanborið við sama mánuð á síðasta ári. Það má þó hugga sig við það að sama má segja um skósölu sem óx um 19% á milli ára. Það má því segja að við vorum hið minnsta í nýjum skóm á fyllerínu þetta sumarið. Þrátt fyrir bölsýnisröfl um slæma stöðu samfélagsins og fýlu vegna lélegra kjarasamninga tókst okkur, eða þeim sem ferðuðust erlendis í júlí að eyða 9 milljörðum á kreditkortunum – já bara í júlí einum og sér, hvað segiði erum við skítblönk ?

Skattpíning ríkisns er alltaf afsökun þegar kemur að verðlagi í landinu. Skemmtileg könnun leiddi það í ljós að verð á flatskjám í Danmörku er miklu lægra en á Íslandi þrátt fyrir hærri álögur þar. Það getur í sumum tilfellum, verið hagstæðara að fljúga til Danmerkur og fjárfesta í sjónvarpi, en að versla tækið hérna heima. Ekki slæmt að fá sér einn kaldan á Strikinu og rífa með sér einn flatskjá með kvöldfluginu heim. Þetta minnir okkur óneitanlega á það hvað við íslenskir neytendur eru miklar rolur og látum bjóða okkur hvað sem, en í könnuninni kom fram að í sumum tilfellum var verðmunurinn vel yfir 100%.

Það vakti athygli mína að það ríkir sérstaða í fiskvinnslu á Þingeyri. Hvers vegna, jú það vinna svo margir íslendingar í frystihúsinu. Já þrátt fyrir að fiskveiðar hafa lagt grunninn að þessari þjóð þá erum við lítið fyrir að vinna við flæðiböndin sjálf. Þess á milli röflum við yfir útlendingunum í landinu og að þeir séu að stela af okkur atvinnutækifærum. Málið er bara að þeir vinna störfin sem við lítum niður á og erum of snobbuð til að sinna. Því var hvíslað að mér (veit ekki hvort það er rétt) að ástandið með biðraðirnar í öryggisgæslunni í Leifsstöð sé tilkomin vegna þess að það næst ekki að manna stöðurnar – sel þetta ekki dýrara en keypti það, en ég hélt að það væri nú skárra að hafa atvinnu en að setja heima á bótum.

Ég fékk hálfgerðan hroll þegar ég sá að 1300 manns sátu námskeið um fjárfestingar. Við erum aðeins brennd eftir fjárfesta, en mig létti þegar ég kynnti mér málið betur og sá að námskeiðið fól í sér víðtækari fræðslu en fyrirsögnin gaf til kynna. Við verðum að læra af fortíðinni og þurfum líka að koma á fjárfestingum í nýsköpun í landinu og slaka á álvershugmyndum og stóriðjukjaftæði. Ef ég vitna í sjálfan mig hérna að ofan, þá dreg ég í efa að það sé mikil eftirspurn íslendinga í framtíðinni að vinna í slíkum verksmiðjum líkt og við sjáum í fiskvinnslunni.

Af hverju skipti Bjarni Ben ekki út seðlabankastjóranum þegar staðan var auglýst? Við þekkjum það víða í stjórnkerfum erlendis að skipt er út lykilmönnum við ríkisstjórnarskipti og það tel ég bara eðlilegt. Hver ríkisstjórn hefur sína efnahagsstefnu og það er einkennilegt að sú staða er komin upp núna að fjöldi atvinnutækifæra eru í boði í landinu, hagvöxtur góður, verðbólgan ásættanleg og líf í samfélaginu, að Már Guðmundsson veður í að hækka stýrivexti út frá eigin svartsýnisspám. Að hanga með einhvern vildarvin síðustu ríkisstjórnar í þessu embætti á ekkert að líðast, Bjarni minn þú hefðir átt að nýta tækifærið og sturta niður eftir vinstri stjórnina.

EN Bjarni Ben við verðum að standa saman með vinaþjóðum okkar og ekki líða yfirgang Rússlands og líta ekki framhjá morðum og mannréttindarbrotum. Þessir talnaglöggu menn sem misreiknuðu sig sýna fram á jú einhverja milljarða sem eru smá aurar miðað við tap þjóðarinnar í hruninu – og við lifum en og erum að hrista þann öldudal af okkur. Jú alltaf leiðilegt að verða af gjaldeyristekjum en við verðum að hugsa til framtíðar en ekki blindast af skammgóðum gróða. Þessi skerðing nær líka þannig lagað bara til um 4% þjóðarinnar og það er alveg til fyrir saltinu í grautinn á þessum heimilum. Ég tek ofan fyrir Unni Brá Konráðsdóttur þingmanni sem er hörð á afstöðu sinni um að standa vörð um mannréttindi og samstöðu vestrænna ríkja.

Það lítur út fyrir að á annað hundrað íslendingar hafi svitnað þegar upplýsingum af framhjáhaldssíðu láku á veraldarvefinn. Já það er víst til sérstök vefsíða fyrir fólk sem vill halda framhjá, síðan er erlend að íslendingar hafa skráð sig til leiks í leit að stundargaman fjarri maka sínum. Það voru víst nokkur hjónabönd sem héngu á bláþræði eftir netárásina á Vodafone á sínum tíma, en nú er spurning hvort prestarnir þurfi að setja sig í stellingar þó ekki dónalegar, heldur meira svona til að taka á móti liðinu þegar allt er sprungið og skilnaðirnir hlaðast inn.

Tek ofan fyrir Krónunni sem selur útrunna matvöru. Það er alveg ljóst að við hendum ári hverju mörgum tonnum af matvöru sem ekkert er að. Flestar matvörur eru troðfullar af rotvarnarefnum og fleiru svo endingin er góð. Það er synd að henta mat þegar milljónir manna svelta á hverjum degi og þetta opnar líka dyr fyrir íslendinga sem hafa lítið á milli handanna – hrós vikunnar fær Krónan fyrir samfélagslega ábyrgð.

Vigdís Hauksdóttir þingmaður var í stuði í vikunni. Hún er búin að fá nóg af ómaklegri gagnrýni sem íslenskir stjórnmálamenn sitja undir. Kommentakerfin og samfélagsmiðlarnir veita mörgum orðljótum innblástur og þorr sem varð til þess að Vigdís kallaði bloggara viðundur. Ég verð að viðurkenna að ég er feginn að hún sé ekki vinur minn á facebook þar sem ég hef nú alveg látið í mér heyra og það getur vel verið að maður hafi verið ómaklegur á einhverjum tímapunkti – en Vigdís og partývinkonur hennar úr Framsókn sem sitja í borgarstjórn liggja bara svo vel undir höggi. Vigdís er samt eins og engill á jólakorti miðað við grýlurnar í borgarstjórninni.

Góða helgi